पिंपरी : कोरोना पॉझिटिव्ह असतानाही आपण पॉझिटिव्ह नसल्याचा कांगावा करीत आपली बदनामी करणाऱ्या एका व्यक्तीविरोधात तक्रार देण्यासाठी कोरोना पॉझिटिव्ह रूग्ण थेट पोलिस ठाण्यात शिरला. ठाणे अंमलदाराकडे तक्रार घेण्याचा तगादा लावत पोलिस ठाण्यात सर्वत्र फेरफटका मारत अक्षरश: धिंगाणा घातला. तो कोरोना पॉझिटिव्ह असल्याचे समजल्यानंतर ठाण्यातील पोलिसांच्या पायाखालची अक्षरश: जमीनच सरकली. हा प्रकार मंगळवारी (ता.7) सायंकाळी देहूरोड पोलिस ठाण्यात घडला.
देहूरोडमधील आंबेडकर चाळ येथील एक जण कोरोना पॉझिटिव्ह आढळला असून, या बाबतचा अहवालही प्राप्त झाला आहे. मात्र, तरीही तो व्यक्ती ऑटो रिक्षातून खुलेआम सर्वत्र वावरत होता. दरम्यान, कोरोनाचा संसर्ग वाढू नये यासाठी स्थानिक नागरिकांनी या बाबत रुग्णालय प्रशासनाला कल्पना दिली. त्याचा शोध सुरू केला. मात्र, आपण पॉझिटिव्ह नसतानाही काही जण आपली बदनामी करीत असल्याचा कांगावा करीत, त्या व्यक्तीने थेट देहूरोड पोलिस ठाणे गाठले. संपूर्ण ठाण्यात फेरफटका मारला. त्यानंतर एकजण आपली बदनामी करीत असल्याबाबत तक्रार देण्यासाठी तो व्यक्ती ठाणे अंलदाराच्या खिडकीसमोर जाऊन उभा राहिला. त्याच्याकडे चौकशी केली असता समजले की, तो पॉझिटिव्ह आहे. यामुळे तेथील पोलिसांची धांदल उडाली.
दरम्यान, त्याने पोलिस ठाण्याच्या आवारातच सिगारेटही फुंकली. त्याला तातडीने ठाण्याच्या बाहेर घेण्यात आले. तेथील पोलिस अधिकारी, कर्मचाऱ्यांसह त्या पॉझिटिव्ह व्यक्तीलाही पीपीई कीट परिधान करण्यात आले. देहूरोड कँटोन्मेंट रुग्णालयाला संपर्क साधण्यात आला. मात्र, त्याठिकाणी जागा उपलब्ध नसल्याचे सांगितल्याने पोलिसांपुढे मोठा प्रश्न निर्माण झाला. अखेर तळेगाव जनरल रूग्णालयात त्याला दाखल करण्याचे निश्चित झाले. त्यानुसार त्याला पोलिस बंदोबस्तात रुग्णालयात दाखल करण्यात आले.
मात्र, यामध्ये पोलिसांची चांगलीच धांदल उडाली. तो ज्या-ज्या ठिकाणी वावरला. तेथे उपस्थित असलेल्या पोलिसांच्या पायाखालची अक्षरश: जमीनच सरकली आहे. हा सर्व गोंधळ दीड ते दोन तास सुरू होता. पोलिस ठाण्याच्या आवारातून त्याला हलविल्यानंतर तेथील पोलिस कर्मचाऱ्यांनी मोकळा श्वास घेतला.
पिंपरी-चिंचवडच्या बातम्या वाचण्यासाठी येथे ► क्लिक करा
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.