पिंपरी - चिंचवडमधील केशवनगर येथे पल्लवी जाधव (Pllavi Jadhav) या चोवीस वर्षीय तरुणीने वायरच्या सहाय्याने गळफास घेऊन आत्महत्या (Suicide) केली. सीएच्या परीक्षेत अपयश येत असल्याने तिने हे पाऊल उचलल्याचे प्राथमिक तपासात समोर येत आहे.

शुक्रवारी (ता. ११) सकाळी पल्लवीने घरात वायरच्या सहाय्याने गळफास घेतला. ही बाब कुटुंबियांच्या लक्षात आल्यानंतर तातडीने तिला रुग्णालयात हलविण्यात आले. मात्र, डॉक्टरांनी तिला मृत घोषित केले. पल्लवी ही सनदी लेखापाल (सीए) होण्यासाठीची परीक्षा देत होती. मात्र, तिला अपयश येत होते. यामुळे ती तणावात असायची.

अशातच ही घटना घडली. दरम्यान, घटनास्थळी दाखल झालेल्या पोलिसांनी तिचा मृतदेह उत्तरीय तपासणीसाठी पिंपरीतील येथील यशवंतराव चव्हाण स्मृती रुग्णालयात पाठवला असून पोलिस अधिक तपास करीत आहेत.