पिंपरी : पूर्वी भांडण झालेल्या मुलीसोबत खेळायला जाते म्हणून सत्तर वर्षीय महिलेने नऊ वर्षीय नातीला झारा गरम करून चटके दिले. त्यात चिमुकलीच्या पायाला, हाताला, तोंडाला इजा झाली आहे. हा धक्कादायक प्रकार विठ्ठलनगर झोपडपट्टी, लांडेवाडी येथे घडला. याप्रकरणी आजीविरोधात गुन्हा दाखल करण्यात आला आहे.

हे वाचा - चला भटकायला ; पुण्यातले किल्ले, ऐतिहासिक वास्तू खुल्या 

प्राची उर्फ जान्हवी प्रदीप गायकवाड (वय 9) असे जखमी मुलीचे नाव आहे. प्राचीची आई सारिका प्रदीप गायकवाड (वय 33, रा. विठ्ठलनगर झोपडपट्टी, लांडेवाडी) यांनी एमआयडीसी भोसरी पोलिस ठाण्यात फिर्याद दिली आहे. त्यानुसार, जडिता विश्वनाथ वाघमारे (वय 70, रा. विठ्ठलनगर झोपडपट्टी, लांडेवाडी) असे गुन्हा दाखल झालेल्या आजीचे नाव आहे. आरोपी जडिता ही फिर्यादी सारिका यांची मावशी आहे.

पुण्यातील इतर बातम्या वाचण्यासाठी क्लिक करा

सारिका यांची मुलगी प्राची ही तिची मैत्रीण तनिष्का सोबत खेळायला जात असे. तनिष्काच्या कुटूंबासोबत आरोपी जडिता हिचे भांडण झाले होते. प्राची ही तनिष्का सोबत खेळायला जाते, याचा जडिता हिला राग येत असे. त्यावरून 30 डिसेंबरला दुपारी बारा वाजता जडिताने प्राचीची मोठी बहीण साक्षी हिला प्राचीला धरून आणण्यास सांगितले. साक्षीने प्राचीला धरून आणल्यानंतर जडिताने गॅसवर झारा गरम करून प्राचीच्या पाय, हात, तोंड आणि गालाला चटके देऊन जखमी केले. याबाबत सहा दिवसानंतर गुन्हा दाखल करण्यात आला आहे.