मोशी : बोऱ्हाडेवाडी येथील महापालिकेच्या कै. महादू श्रीपती सस्ते मुला-मुलींच्या शाळेत पहिले ते आठवीच्या वर्गांबरोबरच आता नववी व दहावीचे वर्गही भरणार आहेत. या नवीन दोन वर्गांना महापालिका शिक्षण मंडळाच्या वतीने मान्यता देण्यात आली आहे.

- ताज्या बातम्यांसाठी डाऊनलोड करा ई-सकाळचे ऍप

- पिंपरी-चिंचवडच्या बातम्या वाचण्यासाठी येथे ► क्लिक करा
 
स्थानिक नागरिकांसह परिसरातील वाड्या-वस्त्यांवरील मध्यमवर्गीय व गोरगरीब विद्यार्थ्यांची शिक्षणाची सोय व्हावी, यासाठी येथील ही शाळा सुरू करण्यात आली. त्यात पहिली ते आठवीपर्यंतचे वर्ग सुरू करण्यात आले. मात्र, त्यानंतरच्या पुढील शिक्षणासाठी या विद्यार्थ्यांना आर्थिकदृष्ट्या न परवडणाऱ्या खासगी शाळांमध्ये जावे लागत होते. याही विद्यार्थ्यांची दहावीपर्यंतच्या पुढील शिक्षणाची सोय याच शाळेत व्हावी, यासाठी स्थानिक नागरिकांनी या प्रभागातील नगरसेविका सारिका बोऱ्हाडे यांच्याकडे मागणी केली होती. त्यानुसार सारिका बोऱ्हाडे यांनी महापालिका शिक्षण समितीकडे येथील शाळेत नववी व दहावीचे वर्गही सुरू करून त्यास मान्यता मिळावी असा प्रस्ताव सादर केला होता. त्यानुसार शिक्षण समितीनेही या प्रस्तावाला मंजुरी दिली आहे. 

पिंपरी-चिंचवड शहरात एक मार्चपासून पार्किंग पॉलिसी

येथील शाळेत नववी व दहावीचे वर्गही सुरू करावेत, अशी मागणी नागरिकांनी केली होती. त्यानुसार समितीकडे प्रस्ताव सादर करीत पाठपुरावा करून हे वर्ग मंजूर करून घेतले आहेत. यामुळे या शाळेत प्राथमिक व माध्यमिक शिक्षणही मिळणार असून, पुढील शिक्षणासाठी नागरिकांना खासगी शाळांमध्ये जावे लागणार नाही. नागरिकांची मागणी पूर्ण करू शकल्याने समाधान वाटत आहे. 
- सारिका बोऱ्हाडे, नगरसेविका 

आगामी शैक्षणिक वर्षापासून नववीचा वर्ग सुरू करण्यात येणार असून, त्यानंतर दहावीचा वर्गही सुरू करण्यात येईल.
- भारती रिठे, मुख्याध्यापिका, कै. महादू श्रीपती सस्ते शाळा