वडगाव मावळ (पुणे) : मावळ तालुक्यात गुरुवारी दिवसभरात ४० जणांचे कोरोना चाचणी अहवाल पॉझिटिव्ह आले, तर दोघांचा मृत्यू झाला. वडगाव येथील ६० वर्षीय पुरुष व पिंपळखुंटे येथील ५७ वर्षीय महिलेचा मृतांमध्ये समावेश आहे. तालुक्यातील एकूण रुग्ण संख्या एक हजार २९५, तर मृतांची संख्या ४७ झाली आहे. दिलासादायक बाब म्हणजे त्यातील सुमारे ६५ टक्के म्हणजेच ८३८ जणांनी कोरोनावर मात केली आहे.

मावळ : कंपनीच्या जनरल मॅनेजरवर हल्ला करणारा सूत्रधार अखेर गजाआड

गुरुवारी कोरोना पॉझिटिव्ह आलेल्या ४० जणांमध्ये तळेगाव दाभाडे येथील सर्वाधिक १४, वडगाव व लोणावळा येथील प्रत्येकी चार, कामशेत व धामणे येथील प्रत्येकी तीन, ऊर्से व इंदोरी येथील प्रत्येकी दोन; तर कुसगाव बुद्रुक, वराळे, कान्हे, बऊर, वडेश्वर, देवघर, बेबडओहळ व शिवणे येथील प्रत्येकी एक जणाचा समावेश आहे.

संततधार पावसाने मावळातील बळिराजा सुखावला; भात पिकाला होणार फायदा

तालुक्यातील कोरोना रुग्णांची संख्या एक हजार २९५ झाली असून, त्यात शहरी भागातील ६५७ व ग्रामीण भागातील ६३८ जणांचा समावेश आहे. तळेगाव येथे सर्वाधिक ४२०, लोणावळा येथे १४०, तर वडगाव येथील रुग्ण संख्या ९७ झाली आहे. तालुक्यात आतापर्यंत ४७ जणांचा मृत्यू झाला आहे. दिलासादायक बाब म्हणजे ८३८ जणांनी कोरोनावर मात केली आहे. गुरुवारी १४ जणांना घरी सोडण्यात आले. 

किती आहे मावळातील धरणांमध्ये पाणीसाठा?

तालुक्यात सध्या ४०९ सक्रिय रुग्ण आहेत. त्यातील २७५ जण लक्षणे असलेले व १३४ जण लक्षणे नसलेले रुग्ण आहेत. लक्षणे असलेल्या २७५ जणांपैकी १९१ जणांमध्ये सौम्य, तर ६८ जणांमध्ये मध्यम स्वरूपाची लक्षणे आहेत. १५ जण गंभीर व एक जण अत्यवस्थ आहे. सध्या ३८७ जणांवर विविध ठिकाणी उपचार सुरु असून, २२ जण गृहविलगीकरणात असल्याची माहिती तहसीलदार मधुसूदन बर्गे, तालुका आरोग्यधिकारी डॉ. चंद्रकांत लोहारे व समन्वयक डॉ. गुणेश बागडे यांनी दिली.