पिंपरी : कोरोनाच्या वाढत्या संसर्गामुळे सुरू असणाऱ्या लॉकडाउनच्या कालावधीत मद्यप्रेमींना घरपोच दारू देण्यास सरकारने परवानगी दिली असली तरी शहरातील हौसिंग सोसायट्यांनी त्याला विरोध केला आहे.

घरपोच दारू पोचविण्यासाठी येणाऱ्या व्यक्‍तींना सोसायटीमध्ये प्रवेश देण्यात येणार नसल्याने संबधित नागरिकांना डिलिव्हरी घेण्यासाठी प्रवेशद्वारावर यावे लागणार असल्याचे पिंपरी-चिंचवड हौसिंग फेडरेशनच्या अध्यक्षा तेजस्विनी ढोमसे-सवाई यांनी सांगितले. 

आणखी वाचा - पुण्यात कोथरूड संदर्भात महापौर मोहोळ यांचा मोठा खुलासा

कोरोनाला सुरुवात झाल्यापासून वाकड, पिंपळे सौदागर, पिंपळे निलख, रहाटणी आदी भागातील सोसायटीच्या आवारात लॉकडाउनचे नियम कडकपणे पाळले आहेत. सक्‍तीने मास्कचा वापर करणे, अत्यावश्‍यक कामासाठीच सोसायटीमधून बाहेर जाण्याची परवानगी, भाजीपाला आणि अन्य सोयी सुविधा सोसायटीच्या आवारातच नागरिकांना उपलब्ध करुन देणे, सोशल डिस्टन्सिंगची अंमलबजावणी या उपाययोजनांच्या माध्यमातून लॉकडाउनमधील अटी नियमांचे पालन केले आहे.

आता सरकारने घरपोच दारू पोचविण्याची सुविधा उपलब्ध केली आहे. त्यामुळे नागरिकांची सोय होणार असली तरी सोसायटीमध्ये कोरोनाचा धोका निर्माण होऊ शकतो. त्यामुळे दारु पोचविण्यासाठी येणाऱ्यांना व्यक्‍तीना सोसायटीमध्ये प्रवेश दिला जाणार नाही. दारू घरपोच करण्यासाठी येणारी व्यक्‍ती कोणत्या भागात राहते, त्याचे आरोग्य कसे आहे, याची माहिती कुणाकडेच नसणार त्यामुळे हा खबरादारीचा उपाय म्हणून याची अंमलबजावणी करण्यात येणार असल्याचे त्यांनी सांगितले. 

पुण्याच्या बातम्या वाचण्यासाठी येथे क्लिक करा

कोरोनाचा प्रादुर्भाव वाढत असल्यामुळे सोसायटीच्या परिसरात भाजी विक्री करण्यासाठी येणाऱ्या भाजीवाल्यांकडे फिट असल्याचे आरोग्य प्रमाणपत्र असणे आवश्‍यक आहे. मेडिकल तपासणी करून घेण्यात आलेले डॉक्‍टरांचे प्रमाणपत्र त्यांनी सोसायटीचे अध्यक्ष, सचिवांना दाखवायचे आहे. त्यानंतरच त्यांना या भागात भाजी विक्री करता येईल, या नियमाची लवकरच अंमलबजावणी करण्यात येणार असल्याचे त्या म्हणाल्या. 

पुण्याच्या बातम्या वाचण्यासाठी येथे क्लिक करा

पुढील आठवड्यापासून चौथ्या टप्यातील लॉकडाउनला सुरुवात होणार आहे. त्यामुळे लॉकडाउन संपत नाही, तोपर्यंत सोसायट्यांकडून सर्व नियमांची काटेकोरपणे अंमलबजावणी करण्यात येणार आहे.  - तेजस्विनी ढोमसे-सवाई, अध्यक्ष, पिंपरी-चिंचवड हाऊसिंग फेडरेशन