पिंपरी - गेल्या दहा महिन्यांपासून शहरातील नागरिकांना कोरोनाने पछाडले आहे. या महामारीचा प्रतिबंध करण्यासाठी महापालिका आरोग्य वैद्यकीय विभाग सज्ज झाला आहे. शनिवारपासून (ता. 16) लसीकरण सुरू होणार आहे. यासाठी महापालिकेकडे 15 हजार डोस प्राप्त झाले असून लसीकरणासाठी आठ केंद्र निश्‍चित केली आहेत. यासाठी एका केंद्रावर पाच या प्रमाणे 40 कर्मचारी नियुक्त केले आहेत. सकाळी नऊ ते सायंकाळी पाच वाजेपर्यंत लसीकरण केले जाणार आहे. पहिल्या टप्प्यात नोंदणी केलेल्या 17 हजार 792 जणांना लस दिली जाणार आहे. 

केंद्र सरकारच्या सूचनांनुसार कोरोनावर नियंत्रण आणण्यासाठी लसीकरण केले जाणार आहे. लस पूर्णतः ऐच्छिक असून पहिल्या टप्प्यात आरोग्य व वैद्यकीय क्षेत्राशी संबंधित अधिकारी व कर्मचाऱ्यांना दिली जाणार आहे. लस घेण्यासाठी इच्छुक असणाऱ्यांनी नाव नोंदणी करावी, असे आवाहन महापालिकेने गेल्या महिन्यात केले होते. त्यानुसार नोंदणी झालेल्यांनाच शनिवारपासून लस दिली जाणार आहे. यासाठी सुरुवातीला 16 केंद्र निश्‍चित केली होती. त्यात काही खासगी रुग्णालयांचासुद्धा सहभाग होता. त्यावर काही संस्थांनी आक्षेप घेतल्याने व सरकारच्या आदेशानुसार आठ ठिकाणीच लसीकरण केंद्र उभारली आहेत. यात महापालिकेची पाच रुग्णालये व दोन दवाखाने व एक ईएसआयएस रुग्णालयाचा समावेश आहे. 

लसीकरण केंद्र 
महापालिकेचे यमुनानगर रुग्णालय, नवीन जिजामाता रुग्णालय पिंपरी, नवीन भोसरी रुग्णालय, वायसीएम रुग्णालय, पिंपळे निलख दवाखाना, कासारवाडी दवाखाना, तालेरा रुग्णालय चिंचवड आणि ईएसआयएस रुग्णालय मोहननगर आदी ठिकाणी लसीकरण केंद्र निश्‍चित केली आहेत. 

पुणे: ५ हजारांची लाच घ्यायला गेली अन् महिला पोलिसच ACBच्या जाळ्यात अडकली

पिंपरीतून प्रारंभ 
महापालिका प्रशासनातर्फे लसीकरणाचा प्रारंभ पिंपरीतील नवीन जिजामाता रुग्णालयात शनिवारी (ता. 16) सकाळी साडेदहा वाजता होणार आहे, अशी माहिती अतिरिक्त आरोग्य वैद्यकीय अधिकारी डॉ. पवन साळवे यांनी दिली. 

लसीकरण केंद्राची रचना 
लसीकरणासाठीच्या प्रत्येक केंद्राची रचना तीन कक्षांमध्ये केली आहे. पहिल्या कक्षात पडताळणी अधिकारी (व्हेरिफिकेशन) असतील. नोंदणी केलेले नाव व लसीकरणास आलेली व्यक्ती तीच आहे किंवा नाही, याची खात्री केली जाईल. त्यानंतर दुसऱ्या कक्षात दोन अधिकारी असतील. तिथे पुन्हा व्हेरिफेकेशन होईल व दुसरी व्यक्ती व्हॅक्‍सिन देईल. त्यानंतर तिसरा निरीक्षण कक्ष असेल. तिथे दोन अधिकारी असतील. लस घेतलेल्या व्यक्तीला अर्धा तास तिथे थांबावे लागेल. त्याच्या प्रकृतीबाबत निरीक्षण डॉक्‍टर करतील. एक सुपरव्हिजन अधिकारी व रुग्णालय प्रमुख असतील, असे आरोग्य वैद्यकीय अधिकारी डॉ. वर्षा डांगे यांनी सांगितले. 

COVID-19 Vaccination Drive: PM मोदी करणार शुभारंभ; जाणून घ्या वेळ आणि बरंच काही!​