पिंपरी : पोलिस आयुक्त कृष्ण प्रकाश, विश्वास नांगरे पाटील माझ्या ओळखीचे आहेत. आम्ही जमिनीचे मॅटर सॉल करतो, त्यांचीही जमिनीची कामे केली आहेत, अशी बतावणी करून खंडणी उकळणाऱ्या तिघांना पिंपरी चिंचवड पोलिसांनी अटक केली. पोलिस आयुक्त कृष्ण प्रकाश यांनी वेषांतर करून ही कारवाई केली.

रोशन बागुल , गायत्री बागुल , पूजा माने , ज्ञानेश्वर , अजित हाके अशी आरोपींची नावे आहेत. याप्रकरणी वेंसेन्ट अलेक्झांडर जोसेफ यांनी फिर्याद दिली आहे. पोलीस आयुक्त कृष्ण प्रकाश ओळखीचे आहेत, आम्ही जमिनीचे मॅटर सॉल करतो, त्यांचे बॉस विश्वास नांगरे पाटील हे ओळखीचे आहेत, मी त्यांची जमिनीची कामे केली आहेत, अशी बतावणी रोशन बागूल यांनी केली. तसेच त्याने महाराष्ट्र पोलीस हेल्पर्स असे लिहिलेले व महाराष्ट्र पोलिसाचा लोगो असलेले बनावट आय कार्ड तयार केले. पोलिस दलाचा सदस्य असल्याचे भासविले. तसेच फिर्यादीकडे पैशांची मागणी केली.

याबाबत माहिती मिळाल्यानंतर स्वतः पोलिस आयुक्तांनी वेषांतर करून निगडीतील भक्ती-शक्ती चौकाजवळील पुना गेट हॉटेल येथे ही कारवाई केली. खंडणीची रक्कम घेताना आरोपींना रंगेहात पकडले.