पिंपरी : उघड्या दरवाजावाटे घरात शिरलेल्या चोरट्याने पावणे दोन लाखाचा ऐवज लंपास केला. ही घटना भरदिवसा काळेवाडी येथे घडली. दरम्यान, या घटनेतील चोरटा सीसीटीव्ही कॅमेऱ्यात कैद झाला आहे.

याप्रकरणी वरून शशिकुमार पिल्ले (रा. राजवाडेनगर, कॉलनी क्रमांक ३, काळेवाडी) यांनी फिर्याद दिली आहे. २३ सप्टेंबरला सकाळी पावणे आठच्या सुमारास फिर्यादी व त्यांचे वडील जिमला गेले होते. तर त्यांचा भाऊ व वहिनी गावी गेले होते. घरात त्यांची आई व आजी होत्या. त्यावेळी घराचा दरवाजा उघडा असताना चोरटा उघड्या दरवाजावाटे घरात शिरला. त्याने घरातील तिन्ही बेडरूममधील लोखण्डी व लाकडी कपाट उचकटून त्यातील एक लाख ७६ हजार ५५० रुपये किमतीचे सोन्याचे दागिने व रोकड लंपास केली. काही वेळानंतर ही बाब फिर्यादी यांच्या आईच्या लक्षात आली. त्यांनी तातडीने फिर्यादी मुलाला घरी बोलावून घेतले. त्यानंतर फिर्यादीने पोलिसाना कल्पना दिली.

दरम्यान, हा चोरटा परिसरातील सीसीटीव्ही कॅमेऱ्यात कैद झाला आहे. त्यामध्ये खांदयावर टॉवेल घेतलेला हा चोरटा परिसरातील घरे हेरत असल्याचे दिसून येते. त्यानंतर फिर्यादी यांच्या घराचा दरवाजा उघड बघून तो आत शिरला. तसेच ऐवज घेतल्यानंतर पळत जातानाही तो दिसून येत आहे. या चोरट्याने परिसरातही चोरी केल्याची माहिती मिळत आहे. दरम्यान, पोलिसांनी सीसीटीव्ही फुटेज प्राप्त झाले असून त्या आधारावर वाकड पोलिस आरोपीचा शोध घेत आहेत.