पिंपरी : शालेय पोषण आहार योजनेअंतर्गत शाळेत वाटप करण्यात येत असलेल्या तांदळामध्ये प्लॅस्टिकचा तांदूळ मिळत असल्याचा प्रकार महापालिकेच्या चिंचवड - केशवनगर शाळेत उघडकीस आला आहे. नियमित तांदळापेक्षा या तांदळाचे वजन कमी असल्याने तो पाण्यावर तरंगताना दिसून येत असल्याचे तक्रारीत म्हटले आहे. याबाबत पालकांनी मुख्याध्यापकांकडे तक्रार केली आहे.

कोरोनामुळे सध्या शाळा बंद आहेत. त्यामुळे मुलांना पोषण आहार शिजवून देण्याऐवजी कोरडा तांदूळ वितरित केला जात आहे. नियमित तांदळापेक्षा या तांदळाचे वजन कमी असल्याने तो पाण्यावर तरंगताना दिसून आल्‍यावर काही पालकांनी महाराष्ट्र नवनिर्माण विद्यार्थी सेनेकडे तक्रार केली. त्यांनी शाळेत पुराव्यानिशी शाळेत पोषण आहार अंतर्गत वाटप करण्यात येणाऱ्या तांदळाची भेसळ उघडकीस आणली. या तांदळात मोठ्या प्रमाणात (केमिकल मिक्स तांदूळ ) आढळून आल्याची माहिती सेनेचे शहराध्यक्ष हेमंत डांगे व उपशहर अध्यक्ष अनिकेत प्रभू यांच्याकडे केली. सर्व प्रकार केशवनगर शाळेचे शिक्षक चपटे यांच्या समोर उघडकीस आणला यांनी ही भेसळ मान्य केली. संबंधितांवर कारवाई करण्याची मागणी त्यांनी केली आहे.

कोट

‘‘शहरात योजनेअंतर्गत वितरित केलेला तांदूळ प्लास्टिक तांदूळ असल्याचा तक्रारी पोषण आहार स्वतंत्र कक्षाला अद्याप प्राप्त झालेल्या नाहीत. तक्रारी प्राप्त झाल्यानंतरच या तांदळाचे नमुने संकलित करून प्रयोग शाळेत तपासणी करण्यात येईल. तसेच याबाबत भारतीय अन्न महामंडळाकडून देखील अभिप्राय घेण्यात येतो. त्यासाठी मुख्याध्यापक व पालकांनी तक्रार केली पाहिजे.’’

-सचिन देशमुख, समन्वयक शालेय पोषण आहार