पिंपरी - रस्त्यावर विनाकारण फिरणाऱ्या दाम्पत्याला पोलिसांनी (Police) नाकाबंदीच्या ठिकाणी अडविले. अँटिजेन तपासणी (Antigen Test) करण्यास सांगितले असता पती तयार झाला. मात्र, पत्नीने भीतीपोटी नकार दिला. माझी तब्येत ठीक आहे, मला काहीही झालेले नसल्याचे सांगत महिला (Women) रडू लागली. परंतु, तपासणी करणे बंधनकारक असल्याचे सांगत तपासणीने काहीही होत नाही, हे पटवून देण्यासाठी एका छोट्या मुलाची तपासणीही करून दाखवली. अखेर महिला तपासणीसाठी तयार झाली अन तपासणीत त्या महिलेचा कोरोना अहवाल पॉझिटिव्ह (Positive) आला. हे समजल्यानंतर दाम्पत्याच्या पायाखालची जमीनच सरकली. उपचारासाठी महिलेला रुग्णालयात दाखल केले. यादरम्यान, वेळीच निदान झाल्याने ‘त्या’ महिलेच्या पतीने डॉक्टर व पोलिस प्रशासनाचे आभार मानले. हा प्रसंग आहे पिंपरी कॅम्पातील. (Police Blocked Road Blockade and Women Turned Positive)

अत्यावश्यक सेवेच्या नावाखाली विनाकारण रस्त्यावर फिरणाऱ्यांची संख्या वाढत आहे. यामुळे कोरोना विषाणूचा प्रादुर्भाव मोठ्या प्रमाणात होत असल्याचे दिसून येत असून, प्रशासनाने कडक भूमिका घेण्याचे ठरवले आहे. पोलिस व महापालिका, जिल्हा परिषदेच्या पथकाकडून विनाकारण फिरणाऱ्यांवर कारवाईचा बडगा उगारला जात आहे. बाहेर पडणाऱ्यांची धरपकड करून चौकशी केली जात असून, अत्यावश्यक काम नसलेल्यांची जागेवरच रॅपिड ॲंटिजेन चाचणी केली जात आहे. त्यामुळे विनाकारण बाहेर पडणाऱ्यांचे धाबे दणाणले आहेत. परंतु काही ठिकाणी नागरिकांकडून पोलिसांशी हुज्जत घालण्याचे प्रकारही घडतात.

पिंपरी-चिंचवड पोलिस आयुक्तालयाच्या हद्दीत ठिकठिकाणी ही तपासणी केली जात आहे. यासाठी महापालिका हद्दीत पोलिस व महापालिकेची सहा पथके तर ग्रामीण हद्दीत पोलिस व जिल्हा परिषदेची तीन पथके तैनात केली आहेत. यामध्ये एक पोलिस अधिकारी, तीन कर्मचारी, होमगार्ड तसेच डॉक्टर व नर्स यांचा समावेश आहे. शनिवारी (ता. २२) दहा ठिकाणी केलेल्या नाकाबंदीत एकूण ५९३ जणांची तपासणी करण्यात आली. यामध्ये ३७ जण पॉझिटिव्ह आढळले. त्यांची तातडीने रुग्णालयात रवानगी करण्यात आली.

दरम्यान, यामध्ये पॉझिटिव्ह आढळलेले रुग्ण पथकाचे आभारही मानतात. जेणेकरून लवकर निदान झाल्याने तातडीने उपचार घेणे शक्य झाले. तर काही जण भीतीनेच गोंधळून जात असल्याचे दिसून येते.

दूर अंतरावरूनच ठोकली धूम

नाकाबंदीच्या ठिकाणी पोलिसांनी थांबविले असता वेगवेगळी कारणे सांगून स्वतःची सुटका करून घेण्याचा प्रयत्न केला जातो. तसेच नाकाबंदीवरील कोरोना तपासणीबाबत समजताच दूर अंतरावरूनच धूम ठोकणाऱ्यांचे प्रमाणही अधिक आहे.

पॉझिटिव्ह येण्याची भीती

तपासणी नको, पॉझिटिव्ह आल्यावर काय करू, भीती वाटतेय, तपासणीवेळी नाकात खूप त्रास होतो, अशी वेगवेगळी कारणे सांगून नागरिक तपासणीसाठी टाळाटाळ करतात. पॉझिटिव्ह येण्याच्या भीतीने अक्षरशः रडून गोंधळ घालतात.

पॉझिटिव्ह रुग्णांचा मुक्त संचार

या पथकाकडून अचानकपणे तपासणी केल्यानंतर पॉझिटिव्ह रुग्ण आढळतात. मात्र, त्रास जाणवत असतानाही केवळ भीतीपोटी दुर्लक्ष करून तपासणी न करता असे रुग्ण बिनधास्तपणे सर्वत्र वावरत असल्याचे नाकाबंदीवरील तपासणीतून स्पष्ट होत आहे. हे बेफिकीर रुग्ण कोरोनाचे सुपर स्प्रेडर ठरत आहेत.