वडगाव मावळ - मावळ तालुक्यातील बऊर गावच्या हद्दीतील एका कंपनीमध्ये १६१ कामगारांची कोरोना टेस्ट पॉझिटिव्ह आली आहे. एखाद्या आस्थापनामधील कामगारांचे एवढ्या मोठ्या संखेने कोरोना चाचणी अहवाल पॉझिटिव्ह येण्याची ही पहिलीच घटना असल्याने तालुक्यात खळबळ उडाली आहे. दरम्यान, या कामगारांचे अहवाल पॉझिटिव्ह आले असले तरी त्यांच्यात कोणतीही लक्षणे आढळली नसल्याची माहिती वैद्यकीय अधिकाऱ्यांनी दिली. त्यामुळे सर्वांना गृहविलगीकरणात ठेवण्यात आल्याचे त्यांनी सांगितले.

शासनाच्या नव्या आदेशानुसार कोणत्याही आस्थापनामधील लस न घेतलेल्या कामगारांची आरपीटीसीआर चाचणी करणे बंधनकारक झाले आहे त्यानुसार बऊरमधील एका कंपनी प्रशासनाने सोमवारी (ता. १२) ३७५ कामगारांची आरटीपीसीआर टेस्ट खासगी लॅबमध्ये केली होती.

शुक्रवारी व शनिवारी त्यातील १६१ कामगारांचे कोरोना चाचणी अहवाल पॉझिटिव्ह आले. त्यांनी याची माहिती शासकीय आरोग्य खात्याला कळविल्यानंतर मावळ तालुका आरोग्य अधिकारी डॉ. चंद्रकांत लोहारे यांच्या मार्गदर्शनाखाली येळसे प्राथमिक आरोग्य केंद्राचे वैद्यकीय अधिकारी डॉ. राजेंद्र मोहिते, डॉ. संदीप मुंडे, आरोग्य सेवक केतन जाधव, आरोग्य सेविका विना धुरंधर, आशा सेविका लता वाळुंजकर आदींच्या पथकाने या १६१ कामगारांची संपूर्ण वैद्यकीय तपासणी केली. टेंपरेचर, ऑक्सिजन लेवल आदी बाबींची तपासणी केली. कोणत्याही कामगारांमध्ये लक्षणे आढळून आली नाहीत. घरी स्वतंत्र व्यवस्था असल्यास गृहविलगीकरणात अथवा कोविड केअर सेंटरमध्ये उपचार घेण्याचा सल्ला देण्यात आला अशी माहिती डॉ. मोहिते यांनी दिली. उर्वरित कामगारांचा अहवाल येणे अद्याप बाकी आहे. दरम्यान, एवढया मोठ्या प्रमाणावर कामगारांचे कोरोना चाचणी अहवाल पॉझिटिव्ह आल्याने तालुक्यात खळबळ उडाली आहे. टेस्ट पॉझिटिव्ह आलेल्या रुग्णांची स्थिती चांगली असल्याने ग्रामस्थांनी घाबरून न जाता काळजी घेण्याचे आवाहन वैद्यकीय अधिकाऱ्यांनी केले आहे.