पिंपरी : पिंपरी चिंचवड महापालिका स्थायी समिती अध्यक्षांच्य स्वीय सहायक कार्यालयात लाचलुचपत प्रतिबंधक विभागाने बुधवारी छापा टाकला. स्वीय सहायकाची चौकशी सुरू आहे. स्थायी समिती अध्यक्ष कार्यालयातून निघून गेले आहेत. महापौर उषा ढोरे यांनी बोलण्यास नकार दिला. पिंपरी-चिंचवड महापालिका स्थायी समितीची बुधवारी दुपारी दोन वाजता साप्ताहिक बैठक ऑनलाइन झाली. बैठकीत ३० विषय मान्यतेसाठी होते. ऐनवेळचेही काही विषय होते ‌. सात विषय तहकूब करण्यात आले. (PCMC News)

सायंकाळी पाच वाजेच्या सुमारास लाचलुचपत प्रतिबंधक विभागाच्या अधिकाऱ्यांनी स्थायी समिती स्वीय सहायक ज्ञानेश्वर पिंगळे यांना महापालिका आवारात ठेकेदाराकडून पैसे घेताना पकडले. त्यानंतर पिंगळे यांना तिसऱ्या मजल्यावरील त्यांच्या कक्षात आणले. त्यांच्यासह चार जणांची चौकशी सुरू आहे. महापालिका भवनाच्या तिसऱ्या मजल्यावर महापौर, स्थायी समिती अध्यक्ष व विरोधी पक्षनेते यांची दालने व त्यांच्या स्वीय सहायकांचे कक्ष आहेत. मात्र, त्यांनी किती रक्कम स्विकारली याबाबत माहिती मिळाली नाही. मात्र, दोन लाख रुपये घेतल्याची प्राथमिक माहिती आहे. दरम्यान, महापालिका भवनात पोलिस बंदोबस्त वाढवण्यात आला आहे.