उर्से, ता. १२ : गणेशोत्सव अवघ्या काही दिवसांवर आला आहे. बाजारपेठेत गणरायाच्या विविध मूर्ती दाखल झाल्या आहेत. तर, काही मूर्तींसाठी बुकिंग सुरू आहे. या पार्श्वभूमीवर पवनमावळातील कलाकार गणेश मूर्तींवर रंगकामाचा अखेरचा हात फिरवत आहेत.
गणेशोत्सव अवघ्या पंधरा दिवसांवर आला आहे. पवनमावळात दररोज पाऊस पडत असल्याने गणेशमूर्तींना दिलेला रंग लवकर सुकण्याची प्रतीक्षा आहे. डोणे गावातील कुंभार कुटुंबातील प्रत्येक जणांकडून गणेशमूर्ती रंगविण्याची कामे वेगाने सुरू आहेत.
पवन मावळातील मूर्ती कारागिरांकडून जवळपास तीन हजार गणेशमूर्ती घडविल्या जातात. डोणे येथील डोणेआई कला केंद्राकडून दत्ता कुंभार, शिवलिंग कुंभार, समीर कुंभार, अजय कुंभार यांच्यासह घरातील प्रत्येक जणांकडून गणपती बाप्पांच्या मूर्ती तयार करण्याची कामे सुरू आहेत. मागील पन्नास वर्षांपासून हे कुटुंब मूर्ती घडविण्याचे काम करते.
यंदा समाधानकारक पावसामुळे सर्वत्र उत्साह आहे. पिकांची परिस्थितीही चांगली आहे. अशा समाधानकारक पार्श्वभूमीवर गणेशोत्सवही चांगल्या पद्धतीने साजरा करण्याचे संकेत गणेशभक्तांमधून मिळत आहेत.

ठळक मुद्दे
आव्हान : सततच्या पावसामुळे रंग सुकण्यास उशीर
पार्श्वभूमी : पाऊस व चांगले पीक, त्यामुळे समाधानकारक वातावरण
स्थिती : काही मूर्ती बाजारात दाखल, काहींसाठी बुकिंग सुरू

BBD25B03332