चऱ्होली, ता.११ : ‘‘वडमुखवाडीतील श्री संत ज्ञानेश्वर महाराज थोरल्या पादुका देवस्थान ट्रस्टतर्फे १६ ऑगस्टपर्यंत श्री ज्ञानेश्वर महाराज थोरल्या पादुका मंदिरात अखंड हरिनाम सप्ताह व ज्ञानेश्वरी पारायण सोहळ्याचे आयोजन करण्यात आले आहे,’’ अशी माहिती ट्रस्टचे अध्यक्ष ॲड. विष्णू तापकीर आणि खजिनदार दत्तात्रेय गायकवाड यांनी दिली.
कैवल्य साम्राज्य ज्ञानचक्रवर्ती श्री संत ज्ञानेश्वर महाराज यांचा ७५० वा जन्मोत्सव सर्वत्र विविध उपक्रमांनी साजरा होत आहे. त्या निमित्त वडमुखवाडी येथील श्री संत ज्ञानेश्वर महाराज थोरल्या पादुका मंदिर देवस्थान ट्रस्टच्यावतीने देखील विविध कार्यक्रमांचे आयोजन करण्यात आले आहे. त्यामध्ये श्रींची महापूजा अभिषेक, सकाळी आठ ते बारा श्री ग्रंथराज ज्ञानेश्वरी पारायण, दुपारी बारा ते सायंकाळी सहा महिलांची भजने, सायंकाळी सहा ते सात हरिपाठ, संध्याकाळी सात ते नऊ महिलांची कीर्तन सेवा रुजू होणार आहे. सप्ताहाच्या काळात कीर्तनकार सुप्रिया साठे, सोनाली फडके, विद्या रेपाळे, अनुराधा धोंडे, सविता काळजे , शीतल गायकवाड यांची कीर्तन सेवा होणार आहे. तसेच चांगुणा महाराज चौधरी यांचे जन्माष्टमी दिनी कीर्तन होईल. ज्ञानेश्वरी महाराज जगताप यांचे १६ ऑगस्ट रोजी सकाळी १० ते १२ यावेळेत काल्याचे कीर्तन होणार आहे. त्यानंतर काल्याच्या महाप्रसादाचे वाटप केले जाणार आहे. १५ ऑगस्ट २०२५ रोजी श्रीकृष्ण जन्म आणि श्री संत ज्ञानेश्वर महाराज यांचा ७५० वा जन्मोत्सवानिमित्त सायंकाळी सहा ते सात श्री संत ज्ञानेश्वर महाराजांच्या प्रतिमेची दिंडी मिरवणूक, मंदिर प्रदक्षिणा होणार आहे. रात्री आठ ते नऊ या वेळात दीपोत्सव, रात्री दहा ते बारा या वेळेत जन्मोत्सवाचे कीर्तन होईल. थोरल्या पादुका मंदिर पंचक्रोशीतील सर्व महिला मंडळ व स्वकाम सेवेकरी यांनी भाविक नागरिकांना विशेष सेवा देणार आहेत.