चिंचवड, ता.२५ ः भोईरनगर चौक ते उद्योगनगर लोकमान्य हॉस्पिटलकडे जाणाऱ्या मुख्य रस्त्याच्या डाव्या बाजूच्या पदपथावर मागील काही दिवसांपासून राडारोडा पडून आहे. त्यामुळे पादचारी पदपथाचा वापर करू शकत नाहीत. या राडारोड्यामुळे वाहतुकीत अडथळा निर्माण झाला आहे. काही ठिकाणी या कचऱ्यातून गवत देखील उगवले आहे.
स्थानिकांनी याकडे प्रशासनाचे लक्ष वेधून घेतले असले, तरी आरोग्य विभागाकडून अद्याप कोणतीही कार्यवाही करण्यात आलेली नाही. दरम्यान, पदपथावरील या अडथळ्यामुळे पादचाऱ्यांना धोकादायकरीत्या मुख्य रस्त्यावरून चालावे लागत आहे.
संबंधित विभागाने राडारोडा हटवून पदपथ स्वच्छ करून पादचाऱ्यांसाठी खुला करावा, अशी मागणी परिसरातील नागरिकांनी केली आहे.