चिंचवड, ता.२८ : दिलासा साहित्य सेवा संघ, शब्दधन काव्यमंच तसेच संवेदना प्रकाशन प्रकाशित लेखिका राधाबाई वाघमारे लिखित ‘जपून ठेवलेल्या आठवणी’ या पुस्तकाचे रविवारी प्रकाशन झाले. तसेच विविध लेखकांचा सत्कार करण्यात आला.
चिंचवड येथील समरसता गुरुकुलममध्ये हा कार्यक्रम झाला. त्याचे उद्‍घाटन ज्येष्ठ सामाजिक कार्यकर्ते गिरीश प्रभुणे यांच्या हस्ते झाले. कोल्हापूरच्या शिवाजी विद्यापीठाचे माजी कुलसचिव डॉ. राजेंद्र कांकरिया, ‍अंनिसचे राज्य कार्यकारिणी सदस्य मिलिंद देशमुख, साहित्यिक नारायण कुंभार, प्रदीप गांधलीकर, प्रकाशक नितीन हिरवे, अशोक महाराज गोरे, मुरलीधर दळवी, सुरेश कंक, सुभाष चव्हाण, श्याम साळुंखे यावेळी उपस्थित होते.
डॉ. कांकरिया म्हणाले, ‘‘राधाबाई वाघमारे म्हणजे चालते बोलते विद्यापीठ आहेत. ८४ व्या वर्षीही विज्ञान प्रसार, अंधश्रद्धा निर्मूलन आणि साहित्य लेखनात त्यांचा सक्रीय सहभाग उल्लेखनीय आहे. पुस्तकात त्यांनी पन्नास वर्षांच्या जीवनातील वास्तव अनुभव मांडले असून हे लेखन पुढील पिढ्यांसाठी प्रेरणादायी ठरेल.’’
प्रभुणे यांनी राधाबाईंच्या संघर्षमय जीवनाचा वेध घेताना वीटभट्टीवर काम करत असतानाही त्यांनी कुटुंबाला आधार दिल्याचे नमूद केले. यावेळी लेखकांचा सत्कार करण्यात आला. त्यामध्ये अशोक गोरे महाराज, नारायण कुंभार, श्यामला पंडित, श्याम सरकाळे, सीमा गांधी यांचा त्यात समावेश होता. तानाजी एकोंडे यांनी आभार मानले.