चिंचवड, ता.२८ ः विश्वकर्मा सोशल वेल्फेअर फाउंडेशन ट्रस्टच्यावतीने आयोजित राज्यस्तरीय समाजभूषण पुरस्कार सोहळा व विद्यार्थी गुणगौरव नुकताच उत्साहात पार पडला. नाशिक येथील विश्वकर्मा मंदिर ट्रस्ट या ९७ वर्षे जुन्या संस्थेला आदर्श सामाजिक संस्था पुरस्काराने गौरविण्यात आले.
चिंचवडमधील प्रा. रामकृष्ण मोरे प्रेक्षागृह येथे वरील कार्यक्रम झाला. या सोहळ्यास संत वैश्वकर्मण धर्माधिकारी, विश्वधारण समर्थ सदगुरू महाराज, उज्जैन पिठाधीश्वर यांची उपस्थिती लाभली.
समाजातील विविध क्षेत्रात उल्लेखनीय कार्य करणाऱ्या व्यक्तींना विश्वकर्मा समाजभूषण पुरस्कार प्रदान करण्यात आला. त्यामध्ये अयोध्या येथील श्री प्रभू रामाची मूर्ती साकारणारे शिल्पकार अरुण सरस्वती योगीराज (म्हैसूर),पत्रकार गोरक्षनाथ लांडगे (धुळे), ग्रामसेवक नामदेव हिरवे (मांढरदेव, सातारा) व सामाजिक कार्यकर्ते देविदास गोरे (संगमनेर) यांचा समावेश होता. शिक्षक संदीप राजगुरू, सायकलिंगपटू महेश दाभोलकर यांना विशेष उल्लेखनीय कार्य पुरस्काराने सन्मानित करण्यात आले.
यावेळी चंद्रपूर येथील इतिहास संशोधक डॉ. चक्रपाणी चोप्पावर यांच्या ‘विश्वकर्मा उपासना’ पुस्तकाचे प्रकाशन यावेळी झाले. फाउंडेशनचे संस्थापक विश्वस्त विवेकानंद सुतार यांनी प्रास्ताविक केले. शिल्पा देशपांडे यांनी सूत्रसंचालन केले; तर दिलीप सुतार यांनी आभार मानले. या सोहळ्याच्या यशस्वी नियोजनासाठी फाउंडेशनचे विश्वस्त प्रकाश दिघे, पांडुरंग सुतार, संगीता सुतार, राजू बारवकर, सुभाष सूर्यवंशी, अध्यक्ष राजाराम दिवेकर, उपाध्यक्ष पांडुरंग सुतार, महिला अध्यक्षा अमृता देगावकर व सर्व सक्रिय सदस्य यांचा मोलाचा वाटा राहिला.