चिंचवड, ता. ३ : नवरात्रोत्सवानिमित्त श्री शिवप्रतिष्ठान हिंदुस्थान पिंपरी चिंचवड यांच्यातर्फे दुर्गामाता दौड यंदाही उत्साहात पार पडली. शहरातीलतरुण, महिला आणि शिवभक्तांनी यात उत्साहाने सहभाग घेतला. यानिमित्त संपूर्ण परिसर देवीचा नामघोष आणि आणि राष्ट्रभक्तीपर गीतांनी दुमदुमून गेला.
महादौडीची सुरुवात वाल्हेकरवाडी येथील छत्रपती शिवाजी महाराज चौकातून झाली. सर्व सहभागी भगवे फेटे परिधान करून ‘जय भवानी-जय शिवराय’च्या घोषणांनी वातावरण रंगवले. या वेळी देवीच्या चरणी ‘‘देव, देश आणि धर्मासाठी बळ, शौर्य आणि पराक्रम मिळावा’’ या साठी प्रार्थना करण्यात आली. या महादौडीचा समारोप चिंचवडगाव येथील श्रीमान मोरया गोसावी मंदिर पटांगण येथे झाला. येथे सामुदायिक प्रार्थनेनंतर पारंपरिक शस्त्रपूजन सोहळाही पार पडला. मार्गात नागरिकांनी फुलांची उधळण व जल्लोषपूर्ण स्वागत करत दौडीचे स्वागत केले. यावेळी संपूर्ण वातावरणात भक्ती, देशप्रेम आणि उत्साहाचे सूर दुमदुमले.