पिंपरी, ता. ३ : चिंचवड उद्योगनगर येथील साई निसर्ग सफायर सोसायटीतर्फे दसऱ्यादिवशी महाभोंडला साजरा करण्यात आला. सोसायटीतील महिलांसह लहानग्या मुलींनी यात सहभाग घेतला. यावेळी गजराज पूजन, फेर धरून गाणी आणि सांस्कृतिक कार्यक्रमांनी परिसर दुमदुमला.
कार्यक्रमाची सुरुवात कविता खापरे यांनी भोंडल्याचे पारंपरिक महत्त्व सांगून केली. त्यानंतर पारंपरिक गाण्यांसह सामुदायिक भोंडला रंगला. नव्या पिढीला आकर्षित करण्यासाठी विशेषतः गुजराती परंपरेतील गरबा नृत्य सादर करण्यात आले. अंकिता ठाकुर यांनी सादर केलेल्या सरस्वती वंदना नृत्याने उपस्थितांची मने जिंकली, तर शोभा भंगिरे यांनी खिरापतीचे महत्त्व सांगितले. अश्विनी पाटोळे व प्रियांका कोंडे यांच्या देवीच्या गीतांवर नृत्याविष्कार सादर केला. या उपक्रमाला पुरुष सदस्यांनीही सहकार्य दिले. खिरापत व अल्पोपहार वाटपाने कार्यक्रमाची सांगता झाली.
‘‘भोंडल्याच्या निमित्ताने एकत्र आल्याने गाणी,खेळ आणि परंपरेचे महत्त्व अधिक जाणवले,’’ असा अभिप्राय अंकिता ठाकुर यांनी व्यक्त केला. ‘‘हा उपक्रम परंपरा,आनंद आणि एकोप्याची छान सांगड घालणारा ठरला. पुढील वर्षीही अशाच पद्धतीने नियोजन व्हावे,’’ अशी प्रतिक्रिया कविता खापरे यांनी दिली.