चिंचवड, ता.८ ः राज्य कामगार कल्याण केंद्र (उद्योगनगर) आणि स्पॅको टेक्नॉलॉजीस कामगार संघटना यांच्या संयुक्त विद्यमाने, मोहननगर येथे कामगार कल्याण योजनांविषयी कामगारांसाठी माहिती सत्र नुकतेच आयोजित करण्यात आले. यावेळी उद्योगनगर केंद्राचे प्रमुख प्रदीप बोरसे यांनी मंडळाच्या विविध कल्याणकारी योजनांची सविस्तर माहिती दिली. कामगार व त्यांच्या कुटुंबीयांना मिळणारे लाभ, विद्यार्थी शिष्यवृत्ती, क्रीडा शिष्यवृत्ती, परदेश शिक्षणासाठी शिष्यवृत्ती, महिला प्रशिक्षण वर्ग, भजन व वक्तृत्व स्पर्धा, गुणवंत कामगार पुरस्कार आदी उपक्रमांची माहिती देण्यात आली. कंपनीचे मनुष्यबळ विभाग प्रमुख मंगेश कर्वे यांचे सहकार्य लाभले. कामगार संघटनेचे सरचिटणीस अनिल कवठेकर यांनी सर्वांचे स्वागत केले; तर धनंजय सावंत यांनी आभार मानले.