चिंचवड, ता.४ ः ‘‘शीख गुरूंनी जात-पात विसरून सर्व समाजाला एकसंघ करण्याचे कार्य अत्यंत दृढतेने केले. राष्ट्रनिष्ठेचा संदेश देत परकीय राजवटींच्या अत्याचारांविरोधात त्यांनी संघर्ष केला. देशासाठी प्राणार्पण करण्याची परंपरा शीख गुरूंनी जपली.’’, असे प्रतिपादन मानसरोवर गुरुद्वाराचे मुख्य सेवक इशमत सिंग यांनी केले.
संत नामदेव महाराज आणि गुरु नानकदेव यांच्या जयंतीनिमित्त नानक-साई सेवा ट्रस्ट यांच्यावतीने आकुर्डी येथे तीन दिवसीय गुरुबाणी व्याख्यानमालेचे आयोजन करण्यात आले आहे. या व्याख्यानमालेतील दुसऱ्या सत्रात ‘शीख गुरूंचे राष्ट्रकार्यातील योगदान’ या विषयावर ते बोलत होते. याप्रसंगी उद्योजक राजेंद्र गांगर्डे, गुरबक्षसिंग मेहता, हरदीपकौर मेहता, रामचंद्र बांगर, संदीप दरवेशी, सचिन राजीमवाले आदी उपस्थित होते.
इशमत सिंग म्हणाले,‘‘देशाच्या रक्षणासाठी उभे राहण्याची प्रेरणा शीख गुरू परंपरेतून मिळते. औरंगजेबासारख्या क्रूर शासकापासून ते काश्मिरी पंडितांचे रक्षण करण्यासाठी गुरू तेगबहादूरसिंग यांनी सहकाऱ्यांसह प्राणाची आहुती दिली. राष्ट्रप्रेम आणि शौर्याचे प्रतीक म्हणून शीख गुरुपरंपरेकडे पाहता येईल.’’
डॉ. श्रीकृष्ण मुंडे यांनी पाहुण्यांची ओळख करून दिली; तर प्रा.अनिल पवळ यांनी सूत्रसंचालन केले. रेणुका शेजुळ, डॉ.तनप्रीतकौर मेहता, बालाजी म्हस्के, भगवंत सिंग, कोटू सिंग यांनी परिश्रम घेतले.