चिंचवड, ता. ५ ः रस्टन कॉलनीत तुळशी-विष्णू विवाहाचा पारंपरिक उत्सव साजरा करण्यात आला. दिवाळीपश्चात विवाहमुहूर्ताच्या प्रारंभाचे प्रतीक असलेला हा सोहळा धार्मिक उत्साह, संगीत आणि सामाजिक एकतेचे सुंदर दर्शन घडवणारा ठरला.
मैत्री बचतगट या महिलांच्या स्वयंसहायता गटाने पूर्ण सोहळ्याचे नियोजन केले. बचतगटाच्या अध्यक्षा अनीता भोसले, उपाध्यक्षा प्रीती भालेराव, खजिनदार भारती कोळगे व सारिका शर्मा यांच्या पुढाकाराने कार्यक्रम यशस्वीरीत्या पार पडला. भोजनाची व्यवस्था पारंपरिक पद्धतीने चुलीवर गोड पदार्थासह करण्यात आली होती. महिलांनी मंगळाष्टक आणि पारंपरिक गाणी गात वातावरण भक्तिमय केले. पुरुष व मुलांनी सजावट आणि प्रसाद वितरणामध्ये सहभाग नोंदवला. रस्टन कॉलनीतील नागरिकांनी कार्यक्रमास उत्साहात हजेरी लावली.