चिंचवड, ता. १८ : संत ज्ञानेश्वर महाराज संजीवन समाधिदिन सोहळ्यानिमित्त वाल्हेकरवाडी येथील श्री नामदेव मंदिरात आयोजित साप्ताहिक ज्ञानेश्वरी पारायण भक्तिमय वातावरणात संपन्न झाले. मंदिराचे अध्यक्ष एकनाथ सदावर्ते आणि व्यवस्थापक निवृत्ती काकडे यांच्या मार्गदर्शनाखाली आठवडाभर विविध धार्मिक उपक्रम राबवण्यात आले. या वेळी भाविकांनी ज्ञानेश्वरी पठण, हरिनाम आणि अभंगांचा आस्वाद घेत मन:शांतीचा अनुभव घेतला. अभंगांच्या स्वरांनी भक्ती, समाधान व शांततेचा अद्‍भूत संगम अनुभवायला मिळाला. भाविकांच्या सेवेसाठी केशव हेंद्रे व माई मुळे यांनी अल्पोपहाराचे नियोजन केले. निवृत्ती काकडे यांच्या वतीने भाविकांना महाप्रसादाचे वाटप करण्यात आले. समारोपप्रसंगी संत ज्ञानेश्वर महाराजांच्या अभंगांनी वातावरण भक्तिमय झाले होते.