चिंचवड, ता.२८ ः चिंचवडच्या चापेकर चौकात मागील आठवड्यापासून चेंबर उघड्या अवस्थेत आहे. यावरून अवजड वाहने गेल्यामुळे चेंबरचे झाकण वारंवार तुटत असून तेथून जाणाऱ्या वाहनचालकांसाठी व पादचाऱ्यांसाठी यामुळे अपघाताचा धोका निर्माण झाला आहे. सध्या या चेंबरवर नागरिकांनी लोखंडी बॅरिकेट उभे केलेले आहेत. तरी संबंधित विभागाने अद्याप याकडे दुर्लक्ष केल्याने नागरिकांमध्ये संताप व्यक्त होत आहे.
चापेकर चौकात नेहमीच वाहनांची वर्दळ असते. वारंवार तुटणाऱ्या या चेंबरमुळे वाहन अडकून अपघात होण्याची शक्यता निर्माण झाली आहे. हे चेंबर मागील चार महिन्यांपासून वारंवार तुटत आहे. त्यामुळे कामाच्या गुणवत्तेवर प्रश्नचिन्ह निर्माण झाला आहे. वेळीच लक्ष न दिल्यास अपघात होण्याची शक्यता असल्याने नागरिकांनी तातडीने या चेंबरचे झाकण बसवण्याची मागणी प्रशासनाकडे केली आहे.