इंदोरी, ता. २८ : मावळ तालुक्यात रात्रभर झालेल्या पावसामुळे इंद्रायणी नदीला पुन्हा पूर आला. दरम्यान, दर्शनाला आलेल्या भाविकांच्या सतर्कतेने कुंडमळा येथील कुंडमाता मंदिरातील साहित्य सुरक्षितस्थळी नेण्यात आले. त्यामुळे नुकसान टळले आहे.

कुंडमाता मंदिर इंद्रायणी नदीपात्रात उंच कातळ खडकावर आहे. रविवारी सकाळी ग्रामस्थ संजय भेगडे दर्शनासाठी आले. दरम्यान, नदीतील पाणी वाढत असल्याचे त्यांच्या लक्षात आले. त्यावेळी त्यांनी धोका लक्षात घेता मंदिरात मुक्कामी असलेले महेश भेगडे, आकाश भेगडे, मनेष भेगडे व दत्तात्रय भेगडे यांना सूचना दिली. तर, मदतीसाठी मनोहर भेगडे, स्वामी भेगडे, सागर भेगडे, संभाजी पवार, सागर पवार यांना बोलावून घेतले. या सर्वांनी मंदिरातील लाउड स्पीकर साहित्य, मंदिराभोवतीचे तात्पुरते लोखंडी कठडे, देवीचा मुकुट व अलंकार आणि अन्य साहित्य ट्रॅक्टरद्वारे सुरक्षितस्थळी नेले. दरम्यान, सुमारे अर्धा तासातच नदीचे पाणी मंदिरात शिरले, असे या नागरिकांनी सांगितले.

PNE25V55056