देहूरोड, ता. १ : देहूरोड कॅन्टोन्मेंट हद्दीत कात्रज-देहूरोड बाह्यवळण महामार्गाच्या सेवा रस्त्यालगत किवळे सीमेजवळ कचऱ्याचे ढीग साचले आहेत. त्यामुळे परिसरातील नागरिकांचे आरोग्य धोक्यात आले असून, कॅन्टोन्मेंट आरोग्य विभागाने या समस्येकडे दुर्लक्ष केल्याचा आरोप स्थानिकांनी केला आहे. कचऱ्यामुळे परिसरात दुर्गंधी पसरली आहे. माशा व डासांची उत्पत्ती वाढल्याने डेंगी, मलेरिया यांसारख्या आजारांचा प्रादुर्भाव होण्याची भीती व्यक्त करण्यात येत आहे. ‘‘आम्ही नियमितपणे स्वच्छता कर भरतो, मग अशा परिस्थितीत कर द्यायचा तरी का?’’ असा सवाल नागरिकांनी उपस्थित केला आहे. येथील समाजसेवकांनी प्रशासनाचे लक्ष वेधत तत्काळ कचरा उचलून परिसराची स्वच्छता करण्याची मागणी केली आहे. अन्यथा नागरिकांच्या आरोग्याचा प्रश्न गंभीर होईल, असा इशारा त्यांनी दिला आहे. संबंधित अधिकाऱ्यांना वारंवार कळवूनही ठोस उपाययोजना न झाल्याने नागरिकांमध्ये तीव्र नाराजी आहे.