देहूरोड, ता. २० : देहूरोड कॅन्टोन्मेंट हद्दीतील किन्हई ते देहूरोड रस्त्यावर दोन ठिकाणी झिरपणारे पाणी साचत असल्याने वाहनचालक आणि नागरिकांची मोठी गैरसोय होत आहे. या रस्त्याचे मध्यभागी सिमेंट काँक्रिटीकरण तर देहूरोड आणि किन्हईकडील बाजूला डांबरीकरणाचे काम करण्यात आले होते. मात्र, काही ठिकाणी पाणी झिरपत असल्याने रस्त्याचे नुकसान होण्याची शक्यता निर्माण झाली आहे. स्थानिक नागरिकांनी पाण्याच्या झिरपणाऱ्या ठिकाणी योग्य उपाययोजना करावी अशी मागणी केली आहे. तसेच या रस्त्यावर पथदिव्यांचा अभाव, रस्त्याच्या दोन्ही बाजूंना वाढलेले गवत यामुळे रात्रीच्या वेळी पायी ये-जा करणाऱ्या नागरिकांना जंगली प्राण्यांचा धोका निर्माण झाला आहे. या पार्श्वभूमीवर कॅन्टोन्मेंट प्रशासनाने तातडीने पथदिवे बसवावेत आणि वाढलेले गवत काढावे, अशी मागणी होत आहे.