किवळे, ता. २८ : सांगवडे-मामुर्डी परिसरातील पालिकेच्या प्रकल्प अभियंता विभागामार्फत पवना नदीवर नवीन पुलाच्या बांधकामाला वेग आला आहे.
या कामासाठी पूर्वीच्या लोखंडी पुलाचा अर्धा भाग पाडण्यात आला असून, नवीन पुलाच्या पाया व संरचनेसाठी आवश्यक असलेले भराव टाकण्याचे काम सुरू आहे. वाढत्या लोकसंख्येमुळे सांगवडे-मामुर्डी मार्गावरील वाहतूक वाढली असून सध्याचा अरुंद लोखंडी पूल वाहतुकीसाठी अपुरा ठरत होता. त्यामुळे नवीन पुलाची गरज जाणवत होती.
स्थापत्य प्रकल्प उपअभियंता नीलेश दाते यांच्या देखरेखीखाली सुरू असलेल्या या पुलाचे काम २०२७ पर्यंत पूर्ण करण्याचे उद्दिष्ट ठेवण्यात आले आहे. पूल पूर्ण क्षमतेने कार्यान्वित झाल्यानंतर परिसरातील वाहतूक सुरळीत होण्यास तसेच आपत्कालीन सेवांना वेगाने मार्ग उपलब्ध होण्यास मदत होईल.