लोणावळा, ता. १८ : आगामी नगर परिषद निवडणुकीसाठी दाखल झालेल्या उमेदवार अर्जांची छाननी मंगळवारी पार पडली. एकूण १५२ अर्जांपैकी आठ अर्ज विविध कारणांमुळे बाद झाले. तर, १४४ अर्ज वैध ठरले.
निवडणूक निर्णय अधिकारी यांच्या उपस्थितीत छाननी प्रक्रिया मंगळवारी सकाळी सुरू झाली. कागदपत्रांतील त्रुटी, अपूर्ण माहिती, पात्रतेसंदर्भातील अटी न पाळल्यामुळे काही अर्ज नाकारल्याची माहिती प्रशासनाने दिली.
यावेळी भारतीय राष्ट्रीय काँग्रेसच्या वतीने दखल करण्यात आलेला बलराज रिले यांचा अर्ज ‘एबी’ फॉर्म नसल्याने बाद झाला. दरम्यान, येथील नगराध्यक्ष पद अनुसूचित जातीसाठी राखीव आहे. नगराध्यक्ष पदासाठी १० उमेदवार रिंगणात आहेत. अर्ज माघारीनंतर लढतीचे चित्र स्पष्ट होणार आहे.
वैध ठरलेल्या उमेदवारांची अंतिम यादी जाहीर करण्यात आली असून २१ तारखेपर्यंत अर्ज माघारीची अंतिम तारीख आहे. त्यामुळे राजकीय घडामोडींना वेग येण्याची चिन्हे आहेत.