लोणावळा, ता. १७ : अखिल भारतीय पूर्व सैनिक सेवा परिषद महाराष्ट्र-गोवा (मावळ) शाखेच्या वतीने विजय दिनानिमित्त माजी सैनिकांचे स्मरण करण्यात आले.
यानिमित्ताने विद्यार्थ्यांसाठी वक्तृत्व स्पर्धेचे आयोजन केले होते. लोणावळा परिसरातील विविध शाळांतील विद्यार्थ्यांनी उत्स्फूर्त सहभाग नोंदवला. सन १९७१च्या भारत-पाक प्रत्यक्ष युद्धात सहभागी झालेले डी. के. हस्ती, मुलांच्या बालमनावर सकारात्मक संस्कार घडविणाऱ्या स्वरूपा देशपांडे, ऋतुजा मेहता, सुचेता खळदकर, आणि सारिका फडके, मल्लखांब प्रशिक्षक विकास गायकवाड, पर्यावरण अभ्यासक शिवाजी गाडे, सूर्यनमस्कार व संस्कारांचे धडे देणारे विश्वनाथ पुट्टोल तसेच अनुकरणीय व्यक्तिमत्त्व म्हणून ओळखल्या जाणाऱ्या शीला जोशी यांचा याप्रसंगी विशेष सन्मान करण्यात आला.
कार्यक्रमाचे प्रमुख पाहुणे वक्ते कर्नल नरेश गोयल यांनी १९७१च्या युद्धाची तसेच परमवीर चक्र विजेत्यांची प्रेरणादायी माहिती देत सेनेतील विविध नोकरीच्या संधींबाबत विद्यार्थ्यांना मार्गदर्शन केले.
या उपक्रमामागील उद्देश मुलांमध्ये देशप्रेम जागृत करणे, तसेच भारतीय सैनिकांनी केलेल्या शौर्याची ओळख करून देणे हा असल्याचे मत माजी सैनिकांनी व्यक्त केले.
या कार्यक्रमाचे माजी सैनिक महेश थत्ते, सोमनाथ मात्रे, बी. व्ही. कडू, माहेश्वर भिंगे, बाळ पवार, प्रकाश गाडे आदींनी संयोजन केले. पंकज जयस्वाल आणि विपिन मोघे यांनी वक्तृत्व स्पर्धेचे परीक्षण केले. सूत्रसंचालन महेश थत्ते यांनी केले.