मोशी, ता. ३ : ‘ऐसी लागी लगन, मीरा हो गयी मगन...वो तो गली गली गली, हरी गुन गाने लगी’, ‘जग में सुंदर है दो नाम, चाहे कृष्ण कहो या राम’, असे सुमधूर बोल सभागृहात उमटताच दर्दी श्रोते असलेल्या पिंपरी-चिंचवडकरांनी सभागृहात टाळ्यांचा कडकडाट केला.
निमित्त होते प्रसिद्ध गझल गायक अनुप जलोटा यांच्या ‘गझल बहार’ गायन कार्यक्रमाचे. आकुर्डीतील संतबाबा मोनी साहेब वृद्ध आनंद आश्रमाला नुकतीच २० वर्षे पूर्ण झाली. त्यानिमित्त संस्थापक अशोक खोसला यांनी पिंपरी चिंचवडकरांसाठी चिंचवड येथील प्रा. रामकृष्ण मोरे प्रेक्षागृहात वरील कार्यक्रमाचे आयोजन केले.
कार्यक्रमात जलोटा यांनी ‘चिठ्ठी आयी है वतन से चिठ्ठी आयी है’, ‘रंग दे चुनरिया’, ‘प्रभुजी तुम चंदन हम पानी’, ‘राम चदरिया झीनी रे झीनी’, ‘राधा के बिना श्याम आधा’, ‘तुम इतना क्यू मुस्कुरा रहे हो’, ‘दमा दम मस्त कलंदर’, ‘आज जाने की जीद ना करो’, आदी त्यांच्या प्रसिद्ध अशा भजन, गीते आणि गझलांच्या गायनाने रसिकांना मंत्रमुग्ध केले. सामाजिक कार्यकर्ते सुरेंद्र वाधवा, रामचंद्र जमतानी, मनजीत सिंग ज्वाला, जय जमतानी, महिंदर सिंग, बलदेव सिंग, हर्षल कौर भाटी, योगेश दुगल, आनंद आगरवाल, परमानंद जमतानी आदींनी परिश्रम घेतले.

संस्थेच्या माध्यमातून आजपर्यंत शहरामध्ये पंकज उदास, जगजीत सिंग, जसबिंदर नुरा, सुरेश वाडकर, हरिहरन यांच्या गायनाचे कार्यक्रम घेतले आहेत. हे सर्व कार्यक्रम आश्रमातील ज्येष्ठांच्या आनंदासाठी घेत असल्याने या सर्व गायकांनी कधीच मानधन घेतले नाही. अनुप जलोटा यांनी देखील कोणत्याही प्रकारचे मानधन घेतले नाही.
- अशोक खोसला, अध्यक्ष, संत मोनी बाबा वृद्ध आनंद आश्रम, आकुर्डी

पिंपरी चिंचवड सांस्कृतिक नगरीमध्ये गझल गायन करताना अद्वितीय असा आनंद झाला. एवढ्या प्रचंड संख्येने जमलेले श्रोते दर्दी आहेत. हा ‘गझल बहार’ संस्मरणीय राहील. मी धन्य झालो. पिंपरी चिंचवडकरांना धन्यवाद.
- अनुप जलोटा, प्रसिद्ध गायक
MOS25B03730