निगडी, ता. ७ ः ‘‘भाषा ही पवित्र गंगोत्री असते. ती प्रवाही राहिल्यास तिचा मोठा सागर होतो. भाषेतील शब्दांची देवाणघेवाण झाल्यामुळे भाषा समृद्ध होते. आपल्या भाषेत हे नवे शब्द रुळले की ते आपले वाटतात. इतर भाषेतील शब्द म्हणजे आक्रमण समजू नये,’’ असे प्रतिपादन ज्येष्ठ साहित्यिक डॉ. न. म. जोशी यांनी केले.
पिंपरी चिंचवड महानगरपालिका, अखिल भारतीय मराठी नाट्य परिषद, पिंपरी चिंचवड शाखा आणि महाराष्ट्र साहित्य परिषद पिंपरी चिंचवड यांच्या संयुक्त विद्यमाने अभिजात मराठी भाषा सप्ताहानिमित्त साहित्यिक चर्चा आयोजित करण्यात आली. त्यावेळी ते बोलत होते. यावेळी ज्येष्ठ पत्रकार सुनील माळी, भाऊसाहेब भोईर, किरण गायकवाड आदी उपस्थित होते.
माळी, भोईर यांनी यावेळी मनोगत व्यक्त केले. श्रीकांत चौगुले यांनी सूत्रसंचालन केले. राजन लाखे यांनी प्रास्ताविक केले.