निगडी, ता. १३ ः ‘‘भगवंताला खऱ्या भक्ताची पारख असल्यामुळे खऱ्या भक्तासाठी भगवंत कोणत्याही क्षणी धावून येतो व त्याची संकटातून मुक्तता करतो हा अनुभव लक्षात घेता भगवंताचा मनोभावे भक्त व्हावे, अशी अपेक्षा अक्रूर महाराज साखरे यांनी व्यक्त केले.
निगडी प्राधिकरण येथे ज्ञानशक्ती मंदिराच्या चतुर्थ वर्धापन दिनानिमित्त ते बोलत होते. दुर्गेश्वर मित्र मंडळ, श्री स्वामी समर्थ मंडळाच्या वतीने या कार्यक्रमाचे आयोजन करण्यात आले होते. यावेळी माजी नगरसेवक अमित गावडे, ज्येष्ठ नागरिक, प्राधिकरण वासीय, महिला, भाविक भक्त मोठ्या संख्येने उपस्थित होते.
यावेळी साखरे महाराज म्हणाले, ‘‘फक्त भौतिक सुखाच्या मागे धावून चालणार नाही. तर खरे सुख समाधान प्राप्त करण्यासाठी देवाचे निरपेक्ष भावनेतून चिंतन करणे आवश्यक आहे. आपली नेमकी गल्लत येथे होते व देव शोधत आपण फिरतो. कीर्तनाला माऊली महाराज आव्हाड, सतीश महाराज भूजाडे यांची साथसंगत लाभली.
कार्यक्रम यशस्वी करण्यासाठी कैलास जायगुडे, संतोष करपे, संदीप शेळके, अमित सूर्यवंशी, सचिन धुमाळ आदींसह दुर्गेश्वर चॅरिटेबल ट्रस्टचे विशेष सहकार्य लाभले. आनंदा साळुंखे, बाळासाहेब धुमाळ, विजय जगताप यांनी विशेष प्रयत्न केले.