जुनी सांगवी, ता. २९ : ‘‘पिंपरी चिंचवड महापालिकेच्यावतीने नव्याने प्रसिद्ध करण्यात आलेल्या सुधारित विकास आराखड्यातील आरक्षण हे गरज नसताना प्रशासनाकडून टाकण्यात आले आहे. स्थानिक नागरिक, लोकप्रतिनिधी यांना विचारात न घेता प्रशासनाकडून ही आरक्षणे टाकली असली तरी ती आम्ही होऊ देणार नाही,’’ असा इशारा आमदार शंकर जगताप यांनी दिला.
समस्त सांगवीकरांच्यावतीने जुनी सांगवीतील बालाजी लॉन्स येथे आरक्षणविरोधी जाहीर निषेध मेळाव्याचे आयोजन करण्यात आले. त्यावेळी ते बोलत होते. माजी महापौर उषा ढोरे, माजी नगरसेवक हर्षल ढोरे, संतोष कांबळे, शारदा सोनवणे, कुणाल साठे, गणेश ढोरे आदी उपस्थित होते.
जगताप म्हणाले, ‘‘गेल्या तीस ते चाळीस वर्षांपासून रखडलेली आरक्षणे विकसित न करता आणि दफनभूमी, स्मशानभूमीची गरज नसताना नको ती आरक्षणे मनमानी पद्धतीने लादण्यात येत आहे. याबाबत अनावश्यक आरक्षणाला विरोध करत एकजुटीने या भागांतील प्रश्न सोडविले जातील.’’
सांगवी परिसरात आधीपासूनच स्मशानभूमी, दफनभूमी आहेत. त्यामुळे नव्याने अशी सुविधा बांधण्याची काही गरज नाही. सांगवीत तब्बल दहा जागांवर शाळांसाठी आरक्षणे टाकण्यात आली आहे. आधीच शासकीय जमिनीमुळे सांगवीकरांचा गळा घोटला गेला आहे. मग, नव्याने आरक्षणे कशासाठी ? असा नागरिकांचा सवाल आहे. महापालिकेच्या नवीन आराखड्यात आणखी आरक्षणे टाकून स्थानिकांवर अन्याय केला जात असल्याचा आरोप नागरिकांनी केला आहे.

नागरिकांची भूमिका...
- आरक्षण बेकायदेशीर, एकतर्फी आणि मनमानी
- स्मशानभूमी, दफनभूमीची मागणी परिसरातील नागरिकांची नाही
- आरक्षित जागेचा उपयोग खेळाचे मैदान, ज्येष्ठ नागरिक केंद्र, वाचनालय, कम्युनिटी हॉलसाठी व्हावा
- शासकीय जागा, जुनी आरक्षणे तपासून प्रस्ताव का नाही दिला

PIM25B20000