पिंपरी, ता.२ ः गेल्या काही महिन्यांपासून जुनी सांगवीत (प्रभाग क्र.३२) अनियमित, कमी दाबाने अपुरा तर कधी खंडित स्वरुपात पाणी पुरवठा होत असल्याने नागरिकांच्या अडचणी वाढल्या आहेत.
पुरेशा पाण्याविना दैनंदिन घरगुती वापर, स्वच्छता तसेच आरोग्याच्यादृष्टीने नागरिकांचे हाल होत असून नागरिकांमध्ये तीव्र नाराजी पसरली आहे. संबंधित विभागाकडे वारंवार तोंडी तक्रारी करूनही अद्याप समाधानकारक उपाययोजना करण्यात आलेल्या नाहीत. या पार्श्वभूमीवर सांगवी परिसरातील पाणीपुरवठा नियमित, सुरळीत, पुरेसा आणि वेळेत करण्यासाठी तातडीने आवश्यक तांत्रिक उपाययोजना राबवाव्यात, तसेच संबंधित विभागास स्पष्ट निर्देश द्यावेत, अशी मागणी नागरिकांकडून करण्यात आली आहे. महापालिका आयुक्तांनी स्वतः या परिसरात प्रत्यक्ष पाहणी करून नागरिकांच्या समस्या जाणून घ्याव्यात, अशीही विनंती त्यांनी केली आहे.