पिंपळे सौदागर, ता. २४ ः लिनियर गार्डन ज्येष्ठ नागरिक संघाची वार्षिक सर्वसाधारण सभा गोविंद गार्डन, पिंपळे सौदागर येथे उत्साहात पार पडली. याप्रसंगी ज्येष्ठ सदस्यांच्या वाढदिवसानिमित्त अभिष्टचिंतन करण्यात आले. कविता वाचन, भावगीत, भक्तिगीत व चित्रपट गीतांच्या सादरीकरणाने कार्यक्रमाला रंगत आली.
सभेच्या अध्यक्षस्थानी अशोक वारकर होते. भाजपचे शहराध्यक्ष शत्रुघ्न काटे यांच्या हस्ते कार्यक्रमाचे उद्‍घाटन झाले.
पांडुरंग कांबळे, अश्विनी शेकटकर, छाया वारकर, सुरेश वाघळकर, सुरेश बरडे आदी उपस्थित होते. माजी विरोधी पक्षनेते नाना काटे, उन्नती सोशल फाउंडेशनच्या संचालिका डॉ. कुंदा भिसे, संजय भिसे यांनी ज्येष्ठांशी मनमोकळा संवाद साधला.
दिलीप ताम्हणे यांनी संघाचा वार्षिक लेखाजोखा सादर केला. त्यानंतर गायिका भारती न्यायाधीश यांनी मराठी व हिंदी सदाबहार गीते सादर करत रसिकांची मने जिंकली. संघातील कलाकार सदस्यांनी कविता वाचन, गीतांनीही मनोरंजन केले. संघाचे अध्यक्ष अशोक वारकर यांनी प्रास्ताविक केले. कीर्ती मालामोरे यांनी सूत्रसंचालन केले. अश्विनी शेकटकर यांनी आभार मानले. कार्यक्रमासाठी हरिमोहन तिवारी, सी. व्ही. ब्राह्मणकर, दगाजीराव पाटील, रमेश काळे, शरदकांत नेरकर, किशोर देशमुख आदी पदाधिकाऱ्यांनी विशेष मेहनत घेतली.