पिंपळे गुरव, ता. ५ ः नवी सांगवी पोलिस ठाण्या शेजारील मुख्य रस्त्यावर सांडपाणी वाहिनी व तिच्या गटारामधून येणाऱ्या दुर्गंधीने नागरिक व पोलिस कर्मचारी यांना प्रचंड त्रास सहन करावा लागत आहे. तक्रारीसाठी किंवा इतर कामांसाठी येणाऱ्या नागरिकांना नाक बंद करुनच थांबावे लागत आहे.
नवी सांगवी पोलिस ठाण्याच्या कमानीशेजारी दोन गटारे असून त्यामधून सतत दुर्गंधी येत असते. ही गटारे वारंवार तुंबत असून दुर्गंधीमुळे पोलिस ठाण्यात ये-जा करणाऱ्या नागरिकांमध्ये सर्दी, खोकला, डोकेदुखी यासारख्या तक्रारी वाढत आहे. या दुर्गंधीचा पोलिस ठाण्यातील कामकाजावरही परिणाम होऊ लागला आहे. परिसरातील नागरिक आणि व्यापाऱ्यांनी ही समस्या वेळोवेळी प्रशासनाच्या निदर्शनास आणून दिली आहे. मात्र, अद्याप ठोस उपाययोजना करण्यात आलेली नाही. या रस्त्यावरून दररोज शेकडो नागरिक ये-जा करत असतात. अशा परिस्थितीत दुर्गंधीमुळे येथे थांबणे देखील कठीण झाले आहे. काही महिन्यांपूर्वी याच गटारामधून पाणी बाहेर पडून पोलिस ठाण्याच्या परिसरात पसरले होते. त्यावेळी संपूर्ण परिसर दुर्गंधीने भरून गेला होता.
या समस्येचे कायमस्वरूपी निवारण करण्यासाठी महापालिकेच्या जलनिस्सारण विभागाने सांडपाणी वाहिनीची पाहणी करुन नवीन सांडपाणी वाहिनी टाकावी, अशी जोरदार मागणी नागरिक व पोलिस ठाण्यामधील कर्मचाऱ्यांकडून केली जात आहे.

नवी सांगवी पोलिस ठाण्याच्या परिसरात वारंवार दुर्गंधी पसरत असल्याने पोलिस ठाणे ते साई चौक येथील सांडपाणी वाहिनी पूर्णपणे खोदून नवीन टाकावी. जेणेकरून समस्या कायमस्वरुपी दूर होईल.
- महेश काळे, स्थानिक नागरिक

या परिसरातील सांडपाणी वाहिनी पाहणी करून योग्य ती कार्यवाही करण्यात येईल.
- शोएब शेख, उपअभियंता, ‘ह’ प्रभाग, पिंपरी चिंचवड महानगरपालिका
PMG25B02659