पिंपळे गुरव, ता. ३ : येथील तुळजाभवानी मंदिराजवळील नदीकाठावर असलेल्या प्रसाधनगृह परिसरात गेल्या काही दिवसांपासून वीज दिवे बंद आहेत. त्यामुळे नागरिकांना जाता-येता गैरसोय होत आहे. नदीकाठ आधीच विरळ व निर्जन असल्याने अंधारामुळे असुरक्षिततेची भावना आणखी तीव्र होते, असे स्थानिक नागरिकांनी सांगितले.
येथे दिवसभर नागरिक वावरत असल्याने तात्पुरता दिलासा असतो; मात्र रात्री प्रसाधनगृह गाठताना ज्येष्ठ नागरिकांना ये- जा करणे कठीण जाते. हेच संकट महिलांनाही सहन करावे लागत आहे. या भागातील वीज दिवे तातडीने कार्यान्वित करावेत, अशी मागणी नागरिकांकडून करण्यात येत आहे.
दरम्यान, ‘‘सायंकाळी, रात्रीच्या वेळी ज्येष्ठ नागरिकांना प्रसाधनगृहात जाताना अंधारामुळे भीती वाटते. पाय घसरून पडणे, नदीपात्राशेजारी असल्याने इतर कीटकांचीही भीती असते. त्यामुळे दिवे त्वरित लावावेत,’’ अशी मागणी स्थानिक नागरिक राम जाधव यांनी केली आहे.

तुळजाभवानी मंदिर परिसरातील सदर प्रसाधनगृह परिसराची पाहणी केली जाईल. त्या भागात वीज दिवे लावण्यात येतील.
- लक्ष्मण इटकर, कनिष्ठ अभियंता, विद्युत विभाग, ‘ड’ क्षेत्रीय कार्यालय