सकाळ इम्पॅक्ट

पिंपळे सौदागर, ता. ७ ः पिंपळे सौदागर परिसरातील बेशिस्त पार्किंगविरोधात सांगवी वाहतूक पोलिसांनी कडक पावले उचलत आठ दिवसांत १२० चारचाकी वाहनांवर दंडात्मक कारवाई केली. या कारवाईने रस्ते बऱ्यापैकी मोकळे झाले असून वाहतुकीचा वेगही सुरळीत झाला आहे.
बेकायदा पार्किंगने वाहतूक कोंडी आणि अपघाताच्या घटना वाढत असल्याने ‘दुचाकीच्या जागेवर चारचाकी वाहनांचा कब्जा’ या मथळ्याखाली ‘सकाळ’मध्ये वृत्त प्रसिद्ध करण्यात आले. त्याची दखल घेत सांगवी वाहतूक पोलिस शाखेने तातडीची कारवाई करत मोहीम हाती घेतली.
सांगवी वाहतूक शाखेचे पोलिस निरीक्षक प्रदीप पाटील यांच्या मार्गदर्शनाखाली बीआरटी मार्गावरील दुचाकी पार्किंगवर चारचाकी वाहने उभी केल्याने पादचारी आणि दुचाकीस्वारांना होणारा त्रास लक्षात घेऊन ही मोहीम राबवण्यात आली.
लिनिअर गार्डन, शिवार चौक, कल्पतरू सोसायटी, पी. के. चौक परिसरात मोठ्या प्रमाणावर नियमभंग करणाऱ्या वाहनचालकांवर दंड आकारण्यात आला आहे. या कारवाईबद्दल नागरिकांनी ‘सकाळ’ आणि सांगवी वाहतूक शाखेचे आभार मानले असून पुढेही ही कारवाई सुरू ठेवावी, अशी मागणी केली आहे.