महिलांनी स्वतःच्या आरोग्याकडे
लक्ष द्यावे ः स्नेहा कलाटे

वाकड, ता. ११ : ‘‘कुटुंबसंस्थेच्या केंद्रस्थानी असलेल्या महिलांचे कुटुंबीयांच्या आरोग्याकडे लक्ष देताना स्वतःच्या आरोग्याकडे दुर्लक्ष होते व त्यातून नकळतपणे काही आजार बळावतात. त्यामुळे महिलांनी थोडा वेळ स्वतः:च्या आरोग्यासाठी द्यावा, योगासने करावीत, योग्य सकस व पौष्टिक आहार घ्यावा तसेच वेळच्या वेळी आरोग्य तपासण्या करून स्वतःला सुदृढ ठेवावे,’’ असे आवाहन वाकड येथील रणजित (आबा) कलाटे फौंडेशनच्या अध्यक्षा स्नेहा कलाटे यांनी केले.
महिला दिनाचे औचित्य साधून वाकड व पिंपळे निलख येथील महापालिकेच्या शाळांमधील विद्यार्थिनींना तसेच अण्णाभाऊ साठे नगर येथील महिलांना सॅनिटरी नॅपकिन पॅडचे वाटप फाउंडेशनच्या वतीने करण्यात आले. प्रशालेच्या मुख्याध्यापिका संगीता टिळेकर, प्रतिभा बनकर, विजया ढमाले, वसुंधरा कुलकर्णी, शबाना शेख, लता सुपे, मंदाकिनी करडे, सविता माने, शशिकला बाळसराफ, विशाखा भागवत, श्वेता अगरवाल, अशोक उनवणे, रामचंद्र पिसे त्याचबरोबर प्रशालेतील विद्यार्थिनी उपस्थित होत्या.
कलाटे म्हणाल्या, ‘‘घरातील काम करण्यापासून नोकरी आणि करिअर घडविण्याचे काम महिला करतात, म्हणूनच त्यांना मल्टीटास्क असे म्हटले जाते. महिलांवर मुले व कुटुंबाची काळजी घेण्याची जबाबदारी असते तसेच त्या स्वतःची वैयक्तिक व व्यावसायिक ध्येय साध्य करण्यात देखील मग्न असतात. अशा व्यस्त जीवनशैलीमुळे अनेक महिलांचे त्यांच्या आरोग्याकडे दुर्लक्ष होते.’’