सोमाटणे, ता. २२ ः शिरगाव पोलिसांकडून सोमाटणे, दारुंब्रे, साळुंब्रे परिसरातील शाळा व तरुणांमध्ये विविध उपक्रमांनी व्यसनमुक्ती जनजागरण मोहीम राबवण्यात आली.
तरुण व शालेय विद्यार्थी अमली पदार्थांपासून दूर राहावे, त्यांनी व्यसनाकडे वळू नये, अमली पदार्थांमुळे होणारे तोटे, परिणाम याची माहिती व्हावी या उद्देशाने पिंपरी-चिंचवड पोलिस आयुक्तालयाच्या आदेशानुसार शिरगाव पोलिसांनी, वरिष्ठ पोलिस निरीक्षक विशाल पाटील यांच्या मार्गदर्शनाखाली ही जनजागरण मोहीम सुरू केली. या मोहिमेअंतर्गत साळुंब्रे, शिरगाव, दारुंब्रे येथील शाळांत सामाजिक संस्थांच्या सहभागाने नाट्याद्वारे प्रबोधन, जनजागरण मोहीम राबवण्यात आली. व्यसनमुक्तीवर आधारीत विद्यार्थ्यांच्या चित्रकला, निबंध स्पर्धा घेण्यात आल्या. याशिवाय पोलिसांच्या वतीने बसथांबे, तरुणांचा वावर असलेली वर्दळीचे ठिकाणे, शाळा, महाविद्यालये आदी ठिकाणी प्रबोधन मोहीम राबविण्यात आली. सोमाटणे येथे तळेगाव पोलिसांच्या वतीने बसथांब्यावर तरुणांना प्रबोधनाद्वारे व्यसनमुक्ती मोहीम राबवण्यात आली.

PNE25V42051
---