सोमाटणे, ता. 24ः पवनमावळात सुरु असलेल्या संततधार पावसाने उघडीप दिल्याने धरणातील विसर्ग कमी केला असून नद्यांची पूरस्थिती पूर्वपदावर आली.
मागील दहा दिवसापासून पवनमावळात जोरदार पाऊस सुरु होता, पावसामुळे पूर्ण क्षमतेने भरलेल्या आढले, पुसाणे, कासारसाई, मळवंडी, पवना धरणातून विसर्ग सुरु करण्यात आला होता. त्यामुळे आढले, कासारसाई, पवना या नद्यांना पूर आला. कासारसाई, पुसाणे धरणातील विसर्गामुळे सांगवडे पूल तर आढले धरणातील विसर्गामुळे दारुंब्रे पूल पाण्याखाली गेला होता. पवना मळवंडी धरणातील विसर्गामुळे
कोथुर्णे, शिवली, बेबड ओहोळ जुना पूल, धामणे, गोडुंब्रे जुना पूल, साळुंब्रे साकव, गहुंजे नवा पूल पाण्याखाली गेले होते. परिणामी गेले आठ दिवस येथील दळणवळण विस्कळित झाले होते. मागील दोन दिवसांपासून पाऊस कमी झाला तर रविवारी पावसाने उघडीप दिली. त्यामुळे पाचही धरणातील विसर्ग कमी झाल्याने तिन्ही नद्यांचा पूर ओसरला. तसेच येथील जनजीवन पूर्वपदावर आले आहे. शेत व भात खाचरातील पाणी कमी झाल्याने भाताचे नुकसान टळले आहे.
smt24Sf1.