पिंपरी, ता. ४ : पीएमआरडीए च्या वेगवेगळ्या विभागातील तीन अधिकाऱ्यांच्या बदल्या झाल्या आहेत. त्यातील अभियांत्रिकी विभागातील दोघांची तर, लेखा विभागातील एका वरिष्ठ अधिकाऱ्याची पदोन्नतीने बदली झाली आहे. नवीन अधिकारी नियुक्‍त न झाल्‍याने अतिक्रमण, अभियांत्रिकी, अग्निशमन आणि विकास परवानगी विभागात अनेक पदे रिक्त आहेत.
अभियांत्रिकी विभागातील कार्यकारी अभियंता संदीप खलाटे यांची मुंबई मंत्रालयात उपसचिव पदावर तर संजय पाटील यांची मुंबईत पर्यटन विकास महामंडळात अधिक्षक अभियंता पदावर पदोन्नतीवर बदली झाली आहे. लेखाविभागातील वरिष्ठ अधिकारी बसवेश्वर पाटील यांची पुणे विभागात स्‍थानिक निधी लेखापरिक्षा विभागात सहसंचालक म्‍हणून बदली झाली आहे. पीएमआरडीएमध्ये शासकीय विभागातून प्रतिनियुक्तीवर सरकारी अधिकाऱ्यांची नेमणूक केली जाते. त्यानुसार प्रामुख्याने अतिक्रमण, प्रशासन, अभियांत्रिकी आणि विकास परवानगी विभागात त्यांची नियुक्ती केली जात आहे. पीएमआरडीएचे कामकाज वाढले असून हिंजवडी आणि चाकण या भागातील नागरी समस्या आणि वाहतूक कोंडी सोडविण्याला प्रशासनाने प्राधान्‍य दिले आहे. त्‍यासाठी मनुष्यबळाची आवश्‍यकता आहे. मात्र, आहे त्‍याच अधिकाऱ्यांच्‍या बदल्‍या झाल्‍याने पदे रिक्‍त होत आहेत.