चिखली, ता.७ : ‘गणपती बाप्पा मोरया, पुढच्या वर्षी लवकर या’ अशा गजरात आणि ढोल ताशे, वाजंत्री या पारंपरिक वाद्यांबरोबर डीजेवर थिरकणारी तरुणाई, अशा वातावरणात चिखली परिसरातील गणपतीला शनिवारी निरोप देण्यात आला. स्वयंघोषित नेते मंडळी आणि त्यांच्या कार्यकर्त्यांच्या डीजेवरील नाचापुढे पोलिस हतबल झाल्याचे दिसून आले.
चिखली परिसरात माजी नगरसेवक सुरेश म्हेत्रे यांचे गजानन म्हेत्रे प्रतिष्ठान, मोरे वस्ती येथील विजय जरे यांचे राजमुद्रा प्रतिष्ठान, यश साने यांचे अभिमन्यू फ्रेंड सर्कल आणि दत्ताकाका साने प्रतिष्ठान, शरद ताम्हाणे यांचे हनुमान मित्र मंडळ, राजू मोरे यांचे अष्टविनायक मित्र मंडळांकडून भव्य मिरवणुका काढण्यात आल्या. पारंपरिक वाद्यांबरोबरच विसर्जन रथाची नेत्रदीपक विद्युत रोषणाई करण्यात आली. तत्पूर्वी, चिखली गावामध्ये हनुमान व्यायाम मंडळ, गांधी चौक मित्र मंडळ, जय भवानी मित्र मंडळाच्या मिरवणुका निघाल्या. या सर्व मिरवणुका भव्य आणि चिखलीकरांचे डोळ्याचे पारणे फेडणाऱ्या ठरल्या.
पोलिस हतबल
अनेक मंडळांनी आवाजाची मर्यादा पळून नियमाचे काटेकोरपणे पालन करून लाडक्या गणरायाला निरोप दिला. मात्र याचवेळी अन्य काही मंडळांनी काढलेल्या मिरवणुकांमध्ये डीजेच्या आवाजाची मर्यादा ओलांडली. स्वयंघोषित नेते मंडळी आणि त्यांची कार्यकर्ते चौका-चौकात थांबून डीजेवर थिरकत होते. आवाजाची कोणतीच मर्यादा न पाळल्याने पोलिसांनाही कानामध्ये कापसाचे बोळे घालून हा खेळ पाहत राहावा लागला.