पिंपरी, ता. १८ : आकुर्डी येथील डॉ. डी. वाय. पाटील अभियांत्रिकी महाविद्यालय व शेजारील शाळा परिसरात वाहतूक कोंडीची समस्या दिवसेंदिवस उग्र झाली आहे. सकाळ-सायंकाळी गर्दीच्या वेळी रस्त्यावर वाहनांच्या रांगा लागल्याने नागरिक, पालक आणि वाहनचालक प्रचंड त्रस्त झाले आहेत. यावर वाहतूक विभागाकडून ठोस उपाययोजना न झाल्याने परिस्थिती अधिक गंभीर होत आहे.

वाहतूक कोंडीची कारणे :
- शाळा सुटण्याच्या वेळेत गर्दी : मुलांना घेण्यासाठी आलेल्या पालकांसाठी वाहनतळ असावे
- अर्बन स्ट्रीट प्रकल्पामुळे रस्ते अरूंद : पूर्वीपेक्षा रस्त्यांची रुंदी कमी झाल्याने मोठ्या प्रमाणावर अडथळा निर्माण होतो
- बेकायदा पार्किंग : परिसरात योग्य पार्किंग व्यवस्था नसल्याने रस्त्यावरच चारचाकी, दुचाकी उभ्या केल्या जातात
- महाविद्यालय व शाळेची एकत्रित गर्दी : सकाळी व दुपारी दोन्ही संस्थांची गर्दी एकत्र आल्याने कोंडी वाढते
- धर्मवीर चौकापर्यंत वाहनांच्या रांगा : वाहन मागे-पुढे नेताना इतर वाहने थांबतात आणि त्यामुळे रांग वाढत जाते

नागरिकांची प्रतिक्रिया :
रोज सकाळ-सायंकाळ वाहनांच्या रांगा लागतात. कधी कधी १५ ते २० मिनिटे एका ठिकाणी गाडी अडकून राहते. विद्यार्थ्यांना वेळेत शाळेत पोहोचणे कठीण जाते.
- शुभम कांबळे, रावेत.

शाळेसमोर पुरेशी पार्किंग जागा नाही. म्हणून वाहने रस्त्यावर उभी करावी लागतात. पण, त्यामुळेच सर्वांनाच त्रास होतो.
वाहतूक पोलिस फक्त काही मिनिटांसाठी येतात. त्यानंतर पुन्हा तीच परिस्थिती होते.
- नीलेश वाघमारे, आकुर्डी.

वाहतूक विभागाची कारवाई अपुरी
आकुर्डीतील या शाळा-महाविद्यालय परिसरात बेशिस्तांवर कारवाईकडे वाहतूक विभागाकडून दुर्लक्ष होत आहे. त्यामुळे स्थानिक नागरिक तसेच वाहनचालकांना याचा नाहक त्रास सहन करावा लागत आहे. कारवाई वाढविणे आवश्यक आहे.

संभाव्य उपाय :
शाळा व महाविद्यालयाजवळ सुसंगत पार्किंग व्यवस्था करणे.
गर्दीच्या वेळेत वाहतूक पोलिसांची नियमित गस्त ठेवणे.
रस्त्यांवरील बेकायदा पार्किंगवर कठोर कारवाई करणे.
विद्यार्थ्यांच्या सुरक्षेसाठी नियमित मार्गदर्शन व वाहतूक व्यवस्थापन करणे.
पर्यायी रस्त्यांची व्यवस्था करून मुख्य रस्त्यावरचा ताण कमी करणे.

आकुर्डीतील डॉ. डी. वाय. पाटील महाविद्यालय परिसरातील वाहतूक कोंडी हा स्थानिक नागरिक, पालक व वाहनचालकांसाठी डोकेदुखीचा विषय बनला आहे. अर्बन स्ट्रीट प्रकल्पामुळे आधीच अरुंद झालेल्या रस्त्यावर वाढलेली वाहनांची गर्दी, शाळा- महाविद्यालयाचा ताण आणि अपुरी वाहतूक व्यवस्था यामुळे ही समस्या दिवसेंदिवस गंभीर होत आहे. वाहतूक विभागाने त्वरीत आणि कायमस्वरुपी उपाययोजना केल्याशिवाय हा प्रश्न सुटणार नाही.