पिंपरी, ता. २० : आम आदमी पक्ष महाराष्ट्र राज्य व पिंपरी चिंचवड शहरतर्फे आयोजित भव्य दहीहंडी सोहळा अतिशय उत्साहात पार पडला. गोविंदा पथकांचे थरारक मनोरे, श्रीकृष्णाचा जयघोषांचा गजर आणि नागरिकांच्या उत्स्फूर्त सहभागाने संपूर्ण परिसर रंगून गेला.
यावेळी शिष्यवृत्तीचे वितरण व दिल्लीचे माजी मुख्यमंत्री अरविंद केजरीवाल यांचा वाढदिवस साजरा करण्यात आला.
यावेळी राज्याचे प्रदेश कार्याध्यक्ष अजित फाटके, युवा आघाडीचे राष्ट्रीय उपाध्यक्ष सिद्धेश भगत, राज्य समन्वयक अमित म्हस्के, शहराध्यक्ष रविराज काळे, युवक प्रदेश अध्यक्ष मयूर दौंडकर आदी उपस्थित होते.
सोहळ्यामध्ये सामाजिक व शैक्षणिक अधिष्ठान देत रसिका गायगोले हिला कै. मुक्ताबाई रामचंद्र बालवडकर यांच्या स्मरणार्थ सावित्रीबाई फुले शिष्यवृत्ती तर कै. शंकर नारायण घोडके यांच्या स्मरणार्थ महात्मा जोतिबा
फुले शिष्यवृत्ती सूरज सोमुसे आणि सुजल जौजाळकर यांना आयोजक काळे यांच्या हस्ते प्रदान करण्यात आली. हा उपक्रम केवळ परंपरेपुरता मर्यादित न राहता परंपरेचा वारसा, सांस्कृतिक जपणूक आणि शैक्षणिक संदेश देणारा ठरला.