पिंपरी, ता. १४ : पिंपरी चिंचवड महापालिकेच्यावतीने उभारण्यात येणाऱ्या त्यागमूर्ती माता रमाई भीमराव आंबेडकर स्मारकाच्या कामाला गती मिळाली आहे. या स्मारकाच्या भूमीपूजनाबाबत महापालिकेचे प्रशासक तथा आयुक्त शेखर सिंह यांची माता रमाई स्‍मारक समितीच्या सदस्यांनी आयुक्त कक्षात भेट घेतली. यावेळी स्‍मारकाबाबत सविस्तर चर्चा केली. त्यामध्ये आयुक्तांनी ऑक्टोबर महिन्यात भूमीपूजन पार पडेल, असे आश्वासन विश्वरत्न महामानव डॉ. बाबासाहेब आंबेडकर व माता रमाई स्मारक समितीच्या सदस्यांना दिले. मागील आठवड्यात या प्रकल्पाचे आर्किटेक्ट व अधिकारी वर्ग यांनी उपस्थित मान्यवरांसमोर प्रकल्पाचे सादरीकरण केले होते. त्यावेळी मान्यवरांनी आवश्यक त्या सुधारणा व सूचना प्रकल्पात समाविष्ट करण्याची भूमिका मांडली.