पिंपरी, ता. १५ ः गेनबा सोपानराव मोझे संस्थेच्या वडमुखवाडी येथील श्री सयाजीनाथ महाराज विद्यालयातील खो-खो संघाची विभागस्तरीय स्पर्धेसाठी निवड झाली. तर, विद्यालयातील प्राथमिक विभागातील राऊ बिराजदार व श्रेया जाधव या दोघी खेळाडू विद्यार्थिनींची विभागीय स्पर्धेसाठी निवड झाली आहे.
पूर्णा नगर, चिंचवड येथील श्री पंडित दीनदयाल क्रीडा संकुलात ११ व १२ सप्टेंबर रोजी १४ वर्षीय मुलींच्या खो-खो स्पर्धा पार पडल्या. या स्पर्धेत एकूण १२४ संघ सहभागी झाले होते. या स्पर्धेत श्री सयाजीनाथ महाराज माध्यमिक विद्यालय व श्री सयाजीनाथ महाराज प्राथमिक विद्यालय यांच्यामध्ये अटीतटीचा अंतिम सामना रंगला. यात माध्यमिक विद्यालयाने अंतिम सामना जिंकून प्रथम क्रमांक पटकावला. तर, प्राथमिक विद्यालयाला द्वितीय क्रमांकावर समाधान मानावे लागले. यामध्ये कर्णधार अपर्णा वर्धे, ज्ञानेश्वरी इंगळे, आराध्या गीते, प्रणिती गवते यांनी अष्टपैलू खेळ करत विद्यालयाला प्रथम क्रमांक मिळवून दिला. या विद्यार्थिनींना विद्यालयातील क्रीडाशिक्षक संजय जैनक व प्रशिक्षक अविनाश करवंदे यांचे मार्गदर्शन लाभले. या यशाबद्दल संस्थेचे संस्थापक अध्यक्ष रामभाऊ मोझे, उपाध्यक्ष ज्ञानेश्वर मोझे, सदस्या प्रा. अलका पाटील, प्राचार्य राजकुमार गायकवाड यांनी विजयी खेळाडू विद्यार्थिनींचे अभिनंदन केले.