पिंपरी, ता. १८ : ‘‘सर्व शिक्षकांना पुढील दोन वर्षांत ‘टीईटी’ (शिक्षक पात्रता परीक्षा) उत्तीर्ण करणे शासनाने अनिवार्य केले आहे. दरम्यान, ‘‘सेवेत कार्यरत असलेल्या शिक्षकांना या तून सवलत मिळावी’’ अशी मागणी महाराष्ट्र राज्य पदवीधर, प्राथमिक शिक्षक व केंद्रप्रमुख संघटनेने केली आहे.
या प्रकरणी मुख्यमंत्री देवेंद्र फडणवीस यांना निवेदन दिले आहे. राज्यातील शाळांमध्ये शिक्षक होण्यासाठी आवश्यक असलेली ‘टीईटी’ परीक्षा २३ नोव्हेंबर रोजी होणार आहे. यासाठी तीन ऑक्टोबरपर्यंत अर्ज भरता येणार आहेत. नव्या आणि वय वर्षे ५३ पर्यंतच्या शिक्षकांनादेखील ही परीक्षा बंधनकारक आहे. सेवानिवृत्ती जवळ आलेल्या, तसेच २०-२५ वर्षांपासून अध्यापन करणाऱ्या शिक्षकांवर यामुळे अन्याय होणार आहे, असा दावा संघटनेने केला आहे.
दरम्यान, ‘‘आरटीई कायद्यानुसार २३ ऑगस्ट २०१० पूर्वी कार्यरत असलेल्या शिक्षकांना टीईटी ही व्यावसायिक पात्रता आवश्‍यक नाही. त्यामुळे शासनाने हा त्यांचाच अधिनियम लक्षात घ्यावा,’’ अशी मागणी संघटनेचे राज्य सरचिटणीस मनोज मराठे यांनी केली आहे.